Жалғыз әйел әкім орнынан кетті
Қызылорда облысының әкімі Гүлшара Әбдіқалықова қызметінен босатылды. Бұл туралы Ақорда хабарлады.
Жаңа әкім болып осыған дейін Қазақстан Республикасы премьер-министрі кеңсесінің өңірлік даму бөлімінің меңгерушісі болған Нұрлыбек Нәлібаев тағайындалды.
Гүлшара Әбдіқалықова - Қазақстан тарихындағы облыс әкімі және Мемлекеттік хатшы болған жалғыз әйел. Оны Қызылорда облысының әкімі етіп 2020 жылдың 28 наурызында президент Қасым-Жомарт Тоқаев тағайындаған.
Айта кетейік, жыл басында болған Қаңтар оқиғасы кезінде наразы халықпен кездесуге алаңға шыққаннан кейін Әбдіқалықова жайлы ел көзқарасы өзгере бастады. Қазақстандағы феминистік ұйымдар оны президент болуға лайықты әйелдер тізіміне қосқан.
Оқи отырыңыз: Әкім Әбдіқалықова, сіз ханның қызысыз ба?
Облыстың жаңа әкімі Нұрлыбек Нәлібаев Қызылорда облысының тумасы, облыс аумағында бірқатар лауазымды қызметтер атқарып, премьер-министр кеңсесіне жұмысқа ауысқан.
