«Зекет» қорының экс-басшысына іздеу жарияланды
Бір топ адамдармен бірігіп бюджет қаражатын қалтаға басқан
Қаржы мониторингі агенттігі 1,1 миллиард теңге бюджет қаржысын жымқырды деген екі күдіктіге іздеу салды. Бұл туралы агенттіктің баспасөз қызметі мәлімдеп отыр. Іздестіріліп жатқан күдіктінің біреуі 2016 жылдары «Зекет» қорының елордалық өкілдігін басқарған Әнуарбек Жексенғалиев.
Агенттік таратқан хабарламада «Қаржы мониторингі кәсіпкер Жексенғалиев А.Б.-ға іздеу жариялады. Ол алдын ала келісім бойынша бір топ адамдармен бірігіп, аса ірі сома 1,1 млрд теңге бюджет қаражатын жымқырды деген күдікке ілінді. Күдіктіні қамауға алу түріндегі бұлтартпау шарасы таңдалған», - деп жазылған.
1,1 млрд теңге бюджет қаражатын жымқыру дерегі бойынша Медетбеков Е.Қ.-ға да іздеу жарияланып отыр. Оны қамауға алу туралы сот санкциясы шығарылған.
Қаржы мониторингі іздеу жарияланған азаматтардың мекен-жайы бойынша кез келген ақпарат туралы +7 7172 708 478, +7 7172 767 921 сенім телефондарына хабарлауды сұрады.
Соңғы кездері зекет пен садақа қаржысына қол сұққандар туралы айтыла бастады. Өткен жылы «Зекет» қорының басшысы Т.Омаровтың заңсыз әрекеттері әшкереленген еді. Қор басшысының халық игілігіне жиналған ақшаны өз қажеттілігіне жұмсап қана қоймай, туысы мен қызын жұмысқа алғаны белгілі болған. Сондай-ақ Омаровтың туған қызы мұқтаждар тізіміне еніп, қазынадан көмек алып отырғаны да бұқаралық ақпарат құралдарын шулатқан-ды.
