2014 жылдың 8 наурызы авиация тарихына ХХІ ғасырдағы ең жұмбақ апаттардың бірі ретінде енді. Malaysia Airlines әуе компаниясына тиесілі Boeing 777–200ER ұшағы Куала-Лумпурдан Бейжіңге бағыт алған рейс кезінде әуеге көтерілгеннен кейін небәрі 40 минут өткен соң Оңтүстік Қытай теңізінің үстінде ғайып болды. Бортта 227 жолаушы мен 12 экипаж мүшесі болғанымен, апаттың нақты орны мен қайғылы оқиғаның себептері бүгінге дейін анықталған жоқ, деп хабарлайды Malim.kz.
Hibiny басылымының жазуынша, ұшақпен байланыс үзілгеннен кейін ол әлі шамамен жеті сағат бойы ұшуды жалғастырған. Әскери радар деректері лайнердің күрт бұрылыс жасап, Малакка бұғазын кесіп өтіп, Үнді мұхитының оңтүстігіне қарай бағыт алғанын көрсетті. Boeing соңғы рет Никобар аралдары маңында тіркелген. Кейінірек ұшақтың кейбір бөлшектері Африка жағалауынан табылғанымен, олардың апаттың негізгі орнына нақты қатысы бар екені түбегейлі дәлелденбеді.
Рейс жолаушылары 14 елдің азаматтарынан тұрған, олардың басым бөлігі – Қытай азаматтары. Ұшақтағы жалғыз ресейлік Иркутск қаласынан шыққан кәсіпкер Николай Бродский болған. Тергеу барысында бастапқыда екі жолаушыға ерекше назар аударылды: 18 жастағы ирандық Пурия Нур Мохаммад Мердад пен 29 жастағы Сейед Мохаммед Реза Делавар. Екеуі де ұрланған төлқұжаттармен ұшып, Интерпол базасында тіркелген. Алайда кейінгі тексеру Мердадтың Германияда тұратын анасына бару үшін, саяси баспана сұрау мақсатында жолға шыққанын анықтады. Жалған құжаттарды қолдануы – ұшақты басып алу жоспары емес, депортациядан қашудың амалы болған.
Тергеу назарын ұшақ командирі – 53 жастағы Захари Ахмад Шах та аудартты. 33 жылдық тәжірибесі бар пилот ажырасудан кейін күйзеліске түскені айтылды.
Кейбір болжамдар апат екінші пилот – 27 жастағы Фарик Абдул Хамидтің әрекеттерімен байланысты болуы мүмкін екенін алға тартады. Ол кабинаға Еуропадан келген жас жолаушы қыздарды жиі шақыратын әдетімен танылған, бұл жағдай сол кештегі оқиғаларға әсер етуі мүмкін деген пікір бар. Ұшақ жоғалар алдындағы диспетчерлер естіген соңғы сөз – "қайырлы түн" болған. Сырттай тыныш естілген осы фразаның артында қазіргі заман авиациясындағы ең құпия оқиғалардың бірі жатыр.
