Ресей әскерлері Украинаның әртүрлі өңірлеріне жасаған жаппай түнгі шабуыл барысында, соның ішінде Одесса облысындағы Украина мен Молдова шекарасындағы өткізу бекетіне де дронмен соққы жасаған. Бұл туралы Украина президенті Владимир Зеленский бейсенбі, 20 тамыз күні Telegram-дағы арнасында мәлімдеді.
БПЛА Молдова мен Румынияның әуе кеңістігін бұзды
Сонымен қатар, өткен түні ұшқышсыз ұшу аппараттары Румыния мен Молдованың әуе кеңістігіне кірді. Бухарестегі Қорғаныс министрлігі Украина шекарасына жақын жерде бір топ әуе нысанының болғанына байланысты екі испандық F-18 жойғыш ұшағы мен румындық тікұшақтың әуеге көтерілгенін мәлімдеді.
Дрондардың бірі шекараны Галац қаласынан шамамен 13 шақырым жерде кесіп өтіп, кейін Тулча уезіндегі адам тұрмайтын аумаққа құлаған. Румыния Қорғаныс министрлігінің мәліметінше, дронның жерге құлауы өртке себеп болған, алайда өрт өздігінен сөнген. Зардап шеккендер мен қираған нысандар жоқ.
Сол түні тағы бір ұшқышсыз аппарат Молдованың әуе кеңістігін бұзды. Болжам бойынша, Shahed-136 («Герань-2») үлгісіндегі дрон Украинадан Рени қаласы маңындағы аумақ арқылы Молдоваға кіріп, Гагаузиядағы Этулия ауылы бағытына ұшқан. Шамамен алты минуттан кейін Молдова аумағынан Украина бағытына қайта шыққан. Бұл туралы Кишиневтегі Қорғаныс министрлігі хабарлады.
Молдова ведомствосы бұл ұшудың Ресейдің Украина аумағына жасаған түнгі соққылары кезінде болғанын да атап өтті.
Польша әскери авиациясын әуеге шығарды
Ресейдің Украинаға жасаған шабуылы барысында Польша да әскери авиациясын әуеге көтерді. Польша Қарулы күштерінің Жедел қолбасшылығы ел аумағының әуе кеңістігінде қолда бар күштер мен құралдардың белгіленген тәртіпке сәйкес іске қосылғанын мәлімдеді.
Бұл шешім Ресейдің Украина аумағына соққы беріп жатқан алыс қашықтықтағы авиациясының белсенділігіне байланысты қабылданған. Бұл туралы Польша тарапы X әлеуметтік желісінде хабарлады.
Сонымен қатар, жерүсті әуе шабуылына қарсы қорғаныс жүйелері мен радиолокациялық бақылау құралдары жоғары дайындық жағдайына келтірілді.
«Бұл шаралар алдын алу сипатында және қауіпсіздікті қамтамасыз етуге, сондай-ақ әуе кеңістігін қорғауға, әсіресе қауіп төнуі мүмкін аймақтармен шектесетін аудандарда қауіпсіздікті қамтамасыз етуге бағытталған», — делінген хабарламада.
Польша Қарулы күштерінің қолбасшылығы барлық күштер мен құралдар «туындаған қауіп-қатерлерге дереу әрекет етуге дайын күйінде тұрғанын» атап өтті.
20 тамызға қараған түні Ресейдің Украинаға жасаған аралас шабуылы салдарынан Киевте кемінде 12 адам қаза тапты, тағы бір адам Киев облысында көз жұмды. Украина Қарулы күштерінің Әуе күштерінің мәліметінше, соққылардың негізгі бағыты Украина астанасы болған.
Сонымен бірге Ресей әскері Украинаға қарсы жалғасып жатқан соғыс барысында «Оникс», «Циркон», «Искандер-М» және S-400 баллистикалық зымырандарын, Х-101, «Искандер-К» және Х-59 қанатты әрі авиациялық зымырандарын, сондай-ақ «Калибр» зымырандарын, «Бандероль» деп аталатын барраждаушы оқ-дәрілерді және әртүрлі типтегі дрондарды қолданған.
