Алматыда тест тапсырып отырған мұғалім қайтыс болды

Оқиға орнында видео түсіріп, оны желіге жүктеген куәгердің сөзінше, тест тапсырып отырған мұғалімнің жағдайы нашарлап, жедел жәрдем келгенше қайтыс болған.

Алматы қалалық полициясы департаменті БАҚ өкілдеріне деректі растаған. Оқиға Алмалы аудандық полиция департаментінде тіркелген. Сот-медициналық сараптамасы тағайындалған.

Қосымша ақпарат алуға полиция департаментіне хабарласқан едік. Телефон қоңырауына да, мессенджердегі хатқа да жауап бермеді.

Ұлттық тестілеу орталығынан келген ақпаратқа сүйенсек, қайтыс болған ер азамат 1973 жылы туған. Ол гипертензиялық (гипертониялық) ауруына байланысты емханада есепте тұрған. Қазіргі уақытта сот-медициналық сараптама жүргізіліп жатыр.

Қаланың білім басқармасының өкілдері марқұмның отбасына көңіл айтып, оларға көмек көрсететіндерін айтқан. 

Бұл осы ұлттық біліктілік тесті болған 4 жылдағы алғашқы өлім оқиғасы. Тестілеу орталықтарында алғашқы көмек көрсету үшін дәрігерлердің жұмысын бақылау күшейтілген. 

Орталық  аттестацияның өзі ерікті сипатқа ие екенін атап өтті. Педагогтер жалақыларына тағы қосымша ақы алу үшін тестілеуге жазылып, осы процедурадан өтеді. Осылайша расталған біліктілік санатына байланысты қосымша ақы төленеді. Тестілеу кезінде мұғалім өзін нашар сезінсе, тест күнін өзгертуге мүмкіндік беріледі.