30 қарашада таңертең Алматыда хостелдердің бірі өртеніп, 13 адам қаза тапты. Бұл туралы төтенше жағдай департаменті хабарлады. Ведомствоның мәліметінше, өрт Әди Шәріпов көшесінде болған.
«30 қарашада сағат 5:33-те хабар түсті. Өрт сөндірушілердің алғашқы тобы оқиға орнына 7 минут ішінде жетті. Олар барған кезде үш қабатты тұрғын үйдің жертөлесінің жанып жатқанын көрген, ғимараттың бірінші қабаты мен жертөлесі хостел ретінде жабдықталған. Өртті барлау және сөндіру кезінде 13 адамның денесі табылды, аты-жөндері анықталып жатыр»,- делінген төтенше жағдайлар департаменті таратқан ақпаратта.
Ведомство қаза болғандар газдан уланып қайтыс болған болуы мүмкін екенін айтады. Нақты себебі анықталып жатыр. Мәлімет бойынша, хостелде 72 адам болған, 59 адам өздігімен сыртқа шығып кеткен.
- Өрт 6:22-де сөндірілді. Өрт аумағы – 30 шаршы метрді қамтыған. Өрттің шығу себебі анықталып жатыр. Өртті сөндіруге 46 адам және 13 техника қатысты,-дейді төтенше жағдайлар департаментінің баспасөз қызметі.
Олардың ақпаратында, бірнеше адамның ауруханаға түскені хабарланды. Біреуі газдан уланған, жағдайы орташа ауыр. Тағы бір адам амбулаторлық емдеуге жіберілген.
