Қаңтар оқиғасы кезінде қаза болған үш курсанттың отбасына баспана бөлу мәселесі 25 сәуірге дейін шешіледі. Бұл туралы премьер-министр орынбасары Ералы Тоғжанов мәлімдеді.
Мәжіліс депутаты Юлия Кучинская жаппай тәртіпсіздіктер кезінде Шекара академиясының курсанттары мен шекарашылар Алматы қаласы әкімдігі мен басқа да стратегиялық нысандарды қорғауға қатысқанын айтты.
"Алматыда көз жұмған бес шекарашы арасында үш курсант бар. Олар Мейірхан Бітім, Әділқан Жайық және Дәулет Жұпарбеков. Мейірхан мен Дәулет небәрі 19 жаста, ал Жайық 22 жаста болды. Президент жарлығымен олар үшінші дәрежелі "Айбын" орденімен марапатталды", - деді депутат мәжіліс отырысында.
Депутаттың сөзінше, заң бойынша оларға 500 АЕК немесе 1,5 миллион теңге біржолғы ақшалай өтемақы беру қарастырылған.
"Өңірлерге сапармен барғанда алматылықтар қаңтар оқиғасы кезінде қаза тапқан Шекара академиясы курсанттарының отбасына пәтер бөлу туралы мәселе көтерді. Осы мәселе үкіметте талқыланды ма, қандай шешім қабылданды?", - деп сұрады депутат.
Вице-премьер Ералы Тоғжанов қаза тапқандардың отбасын үймен қамту мәселесі үкіметтің ерекше бақылауында екенін атап өтті. Ол қаңтар оқиғасы кезінде 19 құқыққорғаушы, соның ішінде Шекара академиясының үш курсанты қаза тапқанын еске салды.
"Бүгінгі таңда шешім қабылданып қойды. 13 адамның отбасына баспана берілді. Қалған алтауының, соның ішінде курсанттардың мәселесі бойынша мен өңір әкімдерімен жеке сөйлестім. Мәселе 25 сәуірге дейін шешіледі", - деп сендірді Тоғжанов.
Байланысты жаналықтар
MalimBlocks
Сұлтанәлі Балғабаев: Дүниежүзі қазақтары қауымдастығын мен тіркетіп едім
Дүниежүзі қазақтары қауымдастығы төрағасы орынбасарлығынан үміткер бір шенеунік өзі бола алмаған соң, айтылған дүниелерді қағазға түсіртіп, құжат жасатпаған. Содан іздеп жүріп, сол жиынды жазып алған радионың бір қызметкерінен дыбысжазбаны алып, сол бойынша өзім хатшы ретінде протокол жасап, тиісті адамдардың қолын қойдырдым. Кейін ұйымның жарғысын жазып шықтым. Солайша, ұйымды Әділет министрлігіне тіркеттік.