Шолақай ауылында қызды зорлап, өлтірген қылмыскерге үкім шықты
8 күннен кейін қыз баланың мәйіті табылған
Жетісу облысы Шолақай ауылында 15 жастағы Құралай Қисабекованы зорлап, өртеп жіберген қылмыскерге үкім шықты. Ол өмір бойына бас бостандығынан айырылды.
Ауыр қылмыс жасаған 39 жастағы Рустам Ахметовке Жетісу облысының қылмыстық істер жөніндегі мамандандырылған ауданаралық сотының судьясы Бақыт Ермаханов осындай жаза кесті.
Естеріңізге сала кетейік, дүйім жұртты дүр сілкіндірген қылмыс осыдан тура алты ай бұрын жасалған еді. Із-түссіз жоғалып кеткен Құралай Қисабекті бүкіл Шолақай ауылының тұрғындары жанұшыра іздеген. Алайда, тек 8 күннен кейін қыз баланың мәйіті табылған.
Мүрде сол ауылдан үш жарым шақырым жерде орналасқан қылмыскердің қыстағының маңынан табылған болатын.
Үкім кезінде судья жаға ұстатар қылмыстың жай-жапсарын баяндады. Тергеу дерегінше, сотталушы алдымен 15 жастағы Құралайды зорлап, айуандықпен өлтірген. Содан соң қыздың жүрек тұсынан үш рет пышақ салған. Кейін бір метр тереңдікте жер қазып, қыз баланың ұялы телефонын сындырып, мәйітті өртеп, көміп тастаған екен.
Жазасын өмір бойы абақтыда өтейтін Рустам Ахметов бұған дейін де қылмыс жасаған. Ол 14 жастағы жасөспіріммен жыныстық қатынасқа түсіп, оған үйленіп, жазадан құтылған. Екінші қылмысында тағы да кәмелетке толмаған қыз баланы зорлап, 5 жылға сотталған болатын. Енді өмір бойына бас бостандығынан айырылған ол жәбірленуші тараптың сұрауы бойынша 10 миллион теңге моральдық өтемақы төлеуге міндеттелді.
