Ұлттық қауыпсіздік комитетінің қызметкерлері сотталды

Алмастың қызымен түскен суреті

2022 жылы Талдықорғанда 8 қаңтар күні полиция Алмас Мұқашевті көшеде әйелімен кетіп бара жатқан жерінен күшпен алып кеткен. Бес күннен соң Алмастың сүйегін туыстары мәйітханадан белгісіз адамдардың арасынан тапқан. Олардың сөзінше, Алмас Мұқашевты ұстап әкеткенде қалтасында құжаттары болған.  Туыстары президент Қасым-Жомарт Тоқаевқа дейін хат жазып, арызданған соң «азаптап өлтіру» бабы бойынша қылмыстық іс қозғалып бүгін Талдықорған қалалық соты үкім шығарды. ҰҚК қызметкері Әнет Байтұрсыновты «Алмас Мұқашевті азаптап өлтірді» деген айыппен 10 жылға бостандығынан айырды. «Естіген ақпаратын тиісті органға хабарламаған» деген айыппен ҰҚК-нің тағы бір қызметкері Андрей Сорокиннің бостандығын 4 жылға шектеп, пробациялық бақылау белгілеген. Адвокаттың айтуынша «Алмасты көшеден ұстаған маска таққан қарулы қызметкерлер Талдықорған қалалық полициясының уақытша ұстау изоляторына апарған. Сол жерде ҰҚК қызметкерлері тергеп, бірер сағатта ұрып өлтірген. Қамаудағы ҰҚК қызметкері Алмасты өлтіріп қойғанын әріптесіне, яғни үйқамақта отырған ҰҚК қызметкеріне айтқан. Ал ол қылмысты ести тұра хабарламаған.  Тергеу кезінде естен танып қалған Алмас Мұқашевқа жедел жәрдем екі рет шақырылған. Бастапқыда тергеуші Әнет Байтұрсынов жедел жәрдемнің Алмасты әкетуіне рұқсат етпеген. Кейін тағы шақырып, ҰҚК тергеушісі де ауруханаға ілесе барған. «Бұл – террорист» деп, әл үстінде жатқан Алмастың қолындағы кісенді де шешкізбеген».

Бас прокурор Берік Асылов Қаңтар оқиғасынан кейін азаптау бойынша 329 қылмыстық іс қозғалғанын айтқан болатын.