Қызылордада 12-ші қарашада облыс әкімі Гүлшара ӘБДІХАЛЫҚОВА облыстық жедел-жәрдем станциясына 44 көлік табыстаған болатын. Бұл санитарлық көліктер жақын арада аудандарға кетуі керек еді. Десек те әлі күнге дейін барлық көлік әлі қаладағы көпбейінді ауруханада екен. Жедел-жәрдем станциясының бас дәрігерлері әлі құжаттарын «растаможкадан» өткізіп жатырмыз дейді. Және де бұл жайт жұмысымызға кедергі болмай тұр дегенді алға тартады. Сонымен су жаңа көліктер қар астында қаңтарылып тұр.
«Табысталған кезде енді жалпы 40 автокөлігіміз келді. Келгеннен кейін 3-4 күннен кейін табыстауға бізге кілтін ұсынды. Енді одан басқа ресми түрде біз құжаттарын дұрыстауымыз керек. Біз енді сақтандыру полисі бар, сосын жанағы техникалық қызметі бар деген сияқты. Осының барлығы қаржы мәселесі келісім бойынша кезең-кезеңімен шешілді. Енді жол полициясынан номер алу қалды. Ол жуық арада шешіледі», - деді Қызылорда облыстық жедел-жәрдем стансасының бас дәрігері Алмат ҚҰРМАНҒАЛИ.
Мемлекеттік номерлері дайын болмасада облыс әкімі жедел жәрдем автокөліктерін жедел беріп тастамақшы болған секілді. Жедел-жәрдем қызметінің бас дәрігері жақын күндері бұл машиналар аудандарға аттанады дейді. Айтуынша, қазіргі аймақтық медицинада көліктен проблема жоқ. Алайда, бұл пікірмен қызылордалықтар келіспейді.
«Жалпы мына халыққа қызмет ететін жедел-жәрдемге көңіліміз толмайды. Себебі шақырсаңыз өзі дер кезінде келмейді. Қазіргі жүрген жедел-жәрдемнің барлығы тозығы жеткен, көне. Осыдан бір ай бұрын облыс әкімі Гүлшара ханым осы жедел-жәрдемге 40 дана жаңа жедел-жәрдем машинасын берді. Сол жедел-жәрдемдерді біз қаланың көшелерінде көрмейміз. Олар неге халыққа қызмет етпейді», - дейді өзін Ғани деп таныстырған тұрғын.
«Үйде науқас анам бар. Уақытылы «скорый» келмейді, сол себепті көңіліміз толмайды. Жарты сағат бір сағат дегенде зорға келеді Коммунизм мөлтек ауданына. Уақытылы мүлдем келген емес осы уақытқа дейін», - дейді Нұрсұлтан есімді тағы бір тұрғын.
Айта кету керек жаңа санитарлық көліктер заман талаптарына сай қосымша құрылғылармен қамтылған. Ішіндегі кислородтың көлемі ескі үлгідегі жедел-жәрдем көліктерінен 2-3 есе көп. Сол себепті қызылордалықтар бұл темір тұлпарларды асыға күтіп отыр десек артық айтпаспыз.
Фотоларды автор ұсынды.
Оңғар САЙМОСАЕВ
Байланысты жаналықтар
MalimBlocks
