«Бар жұмысты денеме арта салдым». Нариман Курбанов қуанышты әсерін айтып берді

Қазақстандық гимнаст Нариман Курбанов Париж-2024 Жазғы Олимпиада ойындарының күміс жүлдесін иеленгеннен кейін алғашқы әсерін айтып берді, деп хабарлайды Malim.kz.

Оның қуанышқа толы әсерлі сөзі Ұлттық Олимпиада комитетінің сайтында жарияланды.

Снарядқа келдім де комбинация басталар алдында бар жұмысты денеме арта салдым. Мимен ештеңе ойламай, тек соңына дейін жаттығуды орындай бердім. Мұның бәрінен қалай өткенімді өзім де түсінбей тұрмын. Ұзақ жылдар бойы жасап жүрген комбинацияны автоматты түрде орындап шықтым. Қазіргі олимпиадалық циклді есепке алар болсақ, мен бағдарлама соңында жиі құлайтынмын. Бұл менің техникалық немесе тактикалық тұрғыдағы кемшілігім емес, психологиялық тұрғыдан беріліп қоятынмын. Бүгін бар тәжірибемді жинап, ең маңызды турнирде білгенімді түгел орындадым, дейді ол.

Өзінің айтуынша, жарыстарда бағдарламаны бірінші де, соңғы да болып  орындап жүрген. Бұл жолы ортаға бірінші шығып, алғаш боп атқа жақындағанда ең үлкен артықшылығы – қарсыластардың бағасын көрмеген. Осы жағынан қысым болмаған.

Ирландиялық спортшының 15,5 ұпай алғанын көрсем, қобалжи бастаушы едім. Олимпиада медалін таныстырған соң, сол суретті сақтап қойдым. Осы маусымдағы әрбір жарыс алдында суретке қарап, армандайтынмын. 18 жасыма қарай жазғы ойындарға қатысып, жүлде алуға асыға бастадым. Мақсат қойдым. Сол мақсатқа жету үшін жұмыс істедім. Елімізде бұл медальді қалай қабылдайтынын, халықтың қалай қуанып жатқанын жақсы түсінемін. Қазір бұл медальді ұстағаннан гөрі, еліміздің қуанып жатқанын көру мен үшін бақыт, деді Құрбанов. 

Айта кетейік, ол спорттық гимнастикадағы тұтқалы ат жаттығуы бойынша 15.433 ұпаймен екінші орын алған еді.

Бұл сында алтын медальді ирландиялық Риз Макленаген иеленді. Оның ұпай көрсеткіші – 15.533. Ал қола медаль америкалық Штефан Недорочектің еншісінде (15.300).

Фото: ҰОК/Сали Сабиров