Қырғыз көкпаршылары шеттетілмек немесе айыппұл арқаламақ
Финалындағы келеңсіз жайтқа қатысты мәлімдеме жасалды
5 Дүниежүзілік көшпенділер ойындарында көкпар тартысында болған келеңсіз жағдайға қатысты бас төреші Тастанбек Есентаев мәлімдеме жасады, деп хабарлайды Malim.kz.
Оның сөзінше, көкпардағы ереже бұзылған сәт он мәрте қаралған. Бірақ, ойынның ішінде қамшымен ұрғаны көрінбейді.
Бұл жайт ойыннан тыс уақытта болды. Қырғыздардың басты талабы – біздің ойыншыны қызыл қағазбен шеттету еді. Біздің ережеде ондай көрсетілмегендіктен, 2 минут алаңнан шығардық. Ары қарай бәсеке таза өтті деп ойлаймын. Екі команда да мықты. Төрешілер тарапынан ешқандай өрескел қателік болмады, дейді Тастанбек Есентаев.
Сондай-ақ, Әнұранға құрмет көрсетпей, мойындарына таққан медальді шешіп, мінез көрсетіп кетіп қалған қырғыздарға нақты шара қолданылатынын да айтты.
Барлығын халық көрді. Дұрыс шешім қабылданды. Наразылық марапаттау сәтінде де жалғасып, қырғыз көкпаршылары мерзімінен бұрын кетіп қалды. Бұл – мәдениетсіздік. Осындай жайттар үшін міндетті түрде шара қолданылады. Қырғыз көкпаршылары 2-3 жылға шеттетіледі немесе ақшалай айыппұл салынады. Нақтысын қазір айта алмаймын, деді бас төреші.
Айта кетейік, бейсенбі күні болған тартысты финалда Қазақстан құрамасы Қырғызстан командасын қосымша уақытта 5:4 есебімен жеңді.
Фото: worldnomadgames.kz
