Қош бол, ағатайым!
Бұл – суыт хабар қалың қазаққа да ауыр соққы, қазақ әдебиеті мен мәдениеті, тарихы мен өнері үшін де орыны толмас өкініш.
Қазақ қара сөзінің қара нары, алаштың жолын қуған алдаспан қаламгер, көне жыраулардың күмбірін бүгінге ұластырған данышпан, ежелгі түріктердіңі ерлік тарихын жаңғыртушы кемеңгер жазушы, менің қайран көкем, абыз ағатайым, классик жазушы Мұхтар ағам өмірден өтті деген қаралы хабар мұхиттан асып жеткенде қабырғам қайысып кетті. Бұл – суыт хабар қалың қазаққа да ауыр соққы, қазақ әдебиеті мен мәдениеті, тарихы мен өнері үшін де орыны толмас өкініш.
Мұхтар ағатайым Жаңа жылдың алдында, 20 қарашада мен қатарлы іні-бауырларына қоңырау шалып, сыр ақтырысып, алғыс-батасын берген еді. Аздап емшара қабылдап жүргенін айтқанымен Қоңыр дауысы тұнық, ойы жігерлі, көңілі шат болғандықтан мәз мейрам боп, баршамыз қуанысып қалған едік. Алда болатын 85 жылдық мерейтойына шығармашылық дайындық жасауды да жоспарлап, бір топ дарынды іні-қарындастарына хабарласып, ағаның сәлемін де жеткізіп,қуанып отырған едік. Амал нешік, міне, бүгін суық хабар жүрегімді қарып кетті. Қайран ағатайым, қаламға адал сертін беріп, сырын ақтарыла сөйлеп, артына 26 том көл-көсір мұра қалдырды, нені айтса да, нені жазса да жасқанбай, жаутаңдамай, батылдықпен, батырлықпен алғаусыз айтып өтті, алашын рухани сергек болуға, тамырлы тарихын, мәйекті мәдениетін ардақтауға үйретті, шынайы да жасампаз ұлт, іргелі де өркениетті жұрт болуға үндеді, қаймана қазағына, өзі ерекше үміт артқан жас буынға қайрат беріп, отанымыздың гүлденуге ересен еңбек ететініне кәміл сенді. Қазақ елі барда, алаш жұрты барда, мұраңыз мәңгі сөнбейді, алауыңыз өшпейді, көктегі күнмен бірге, атар таңмен бірге алашыңыздың жүрегінде мәңгі жасай бересіз, Мұхтар ағатайым. Аттила, Оғыз хан, Күлтегін, Йолықтегін, Шыңғысхан,Қасымхан, Есімхан рухымен бірге халқыңызға демеу, мәңгі қорған бола бересіз! Бақұл болыңыз, рухыңыз бейіште шалқысын, Алла алдыңыздан жарылқасын. Қош бол, ағатайым!
Ақеділ Тойшанұлы, әдебиеттанушы, ғалым.
