АҚШ БҰҰ-ның Газада атысты тоқтату туралы қарарына вето қойды

Қарарды БҰҰ Қауіпсіздік Кеңесінің тұрақты емес 10 мүшесі әзірлеген. Онда Газа секторында атысты жылдам тоқтату туралы айтылған. Қарарға АҚШ-ты қоспағанда Кеңестің қалған 14 мүшесі дауыс берді. 

Сондай-ақ қарар Газа секторындағы израильдік тұтқындардың барлығын «дереу және сөзсіз босатуды» талап етеді. Вашингтон Газадағы атысты келісімсіз тоқтату талабына қарсы шықты.

АҚШ-тың БҰҰ-дағы арнайы өкілінің орынбасары Роберт Вуд Нью-Йорктегі сессияда дауыс беру алдында АҚШ тек атысты тоқтату аясында кепілге алынғандарды дереу босатуды нақты талап ететін қарарды ғана қолдайтынын мәлімдеді.

«Біз бұған дейін бірнеше рет мәлімдегеніміздей, кепілге алынғандарды босатпай атысты тоқтатуды қолдай алмаймыз. Соғыс кепілге алынғандарды босатумен аяқталуы керек. Бұл екі өзекті мақсат бір-бірімен тығыз байланысты. Бұл қарар бұл қажеттілікті жоққа шығарды, сондықтан Құрама Штаттар оны қолдай алмады», - деді АҚШ-тың БҰҰ-дағы ресми өкілі.

Жалпы АҚШ атысты тоқтату Газада кепілге алынған барлық адамның аман-есен бостандыққа шығуымен байланысты болуы керек деп санайды.

Израильдің БҰҰ-дағы Елшісі Дэнни Данон АҚШ-қа вето құқығын пайдаланғаны үшін алғыс айтып, Байден әкімшілігі «адамгершілік пен әділеттілік жағында» екенін мәлімдеді.

Ал Палестинаның БҰҰ-дағы өкілінің орынбасары Маджед Бамия Қауіпсіздік кеңесінің сәрсенбі күні таңертең өткен отырысында атысты тоқтату көптеген адамның өмірін сақтап қалады деді.

«Әлем жазықсыз палестиналықтардың өліміне, аш жүрген палестиналық балаларға, балаларын алып, бір жерден екінші жерге мәжбүрлі қоныс аударған аналарға үйренбеуі керек», - деді Палестина өкілі.

Айта кететін жайт, бұл АҚШ президенті Джо Байден әкімшілігінің Израиль өткен қазан айында әскери шабуылын бастағаннан бері Газа секторындағы соғысты тоқтатуды талап ететін қарарға тыйым салып отырған төртінші жағдай.

Еске салсақ, АҚШ Палестинаға БҰҰ-ға толық мүшелік мәртебесін беру туралы Қауіпсіздік Кеңесінің қарарына вето қойды.

Фото: UN News