АҚШ-та торнадо салдарынан кем дегенде 33 адам қаза тапты, деп хабарлайды Malim.kz BBC-ге сілтеме жасап.
Қазір Американың орталық және оңтүстік аймақтарында соққан қатты құйынның (торнадо) салдарын жою жұмыстары жүргізіліп жатыр. Ең көп зардап шеккен Миссури штаты болды. Жергілікті биліктің хабарлауынша, онда дүлей дауыл 12 адамның өмірін қиған.
Сондай-ақ табиғат апатынан Оклахома, Теннесси, Арканзас, Техас және Джорджия штаттары да орасан зор зардап шекті. Ғимараттар қирап, жолдағы көліктер аунап, электр желілері үзілген.
Арканзас пен Джорджияда қайталап соғуы ықтимал дүлей дауылға байланысты төтенше жағдай режимі жарияланды. Оклахоманың кейбір аудандарында эвакуация жүргізілді. Бұл штатта 130-дан астам өрт болып, 300-ге жуық үй тілсіз жаудан зиян шеккен.
Ұлттық ауа райы қызметіне қарасты күн райын болжау орталығының мәліметінше, қазір ең үлкен қауіп оңтүстік штаттарға төніп тұр. Торнадо таяу сағаттарда батыс Флорида мен Джорджияға жетеді деп күтілуде. Метеорологтардың хабарлауынша, торнадо қарқындылығы азайып келеді, бірақ кейбір штаттар үшін қауіп әлі сейілген жоқ.
Фото: Reuters
MalimBlocks
