CNN сайтының хабарлауынша, Дональд Трамп Илон Масктың мемлекеттік қызметтен кетіп, өз компанияларын басқаруға қайта оралатынын мәлімдеді, деп хабарлайды Malim.kz.
"Оған үлкен компанияны басқару қажет және бір уақыты келгенде ол бизнеске қайта оралады", – деді Трамп.
Сондай-ақ, ол Маскты "мүмкіндігінше ұзақ ұстайтынын", себебі миллиардер "өте талантты және ақылды адам" екенін атап өтті.
Politico басылымы бұл туралы нақтылап, Масктың уақытша мемлекеттік қызметкер ретінде классификацияланғанын және оның 130 күндік мерзімі мамыр айының соңында аяқталатынын хабарлады.
Сонымен бірге, Трамп журналистерге DOGE (Үкіметтің тиімділігі департаменті) деп аталатын агенттікке Масктың басшылығының әсері ұзақ сақталатынын айтты. Президенттің пікірінше, министрлер кабинеті мен агенттік басшылары бұл тәжірибеден көп нәрсе үйренген.
"Бір кезде министрлер бұл жұмысты өздері орындай алатын болады", – деді Трамп.
Наурыз айында Трамп министрлерді жинап, кадрлық саясат бойынша соңғы шешімді федералды агенттіктердің басшылары қабылдайтынын, ал DOGE басшысы Илон Масктың бұл мәселеге араласуға құқығы жоқ екенін мәлімдеген болатын.
Жақында АҚШ Ақ үйі сот құжаттарында Масктың үкіметтегі рөліне қатысты түсініктеме беріп, оның ешқандай ресми мемлекеттік шешімдер қабылдау құқығы жоқ екенін нақтылады.
Фото: Bloomberg/Getty Images
