Райан Рутқа Дональд Трампқа қастандық жасады деп ресми түрде айып тағылды

15 қыркүйекте Райан Рут Дональд Трамптың гольф клубының маңында автоматпен ұсталған.  Оған экс-президетке қастандық жасамақ болды деген ресми айып тағылды. Бұл туралы сейсенбіде АҚШ Әділет министрлігі хабарлады.

Әділет министрлігі демократиямыздың мәніне қарсы зорлық-зомбылыққа жол бермейді және біз мұндай қадамға барғандарды тауып, жауапқа тартамыз, - деді министрлік басшысы, АҚШ Бас прокуроры Меррик Гарланд.

Қазір 58 жастағы Райан Рут қамауда отыр. Оған бұған қаруға қатысты екі бап бойынша айып тағылған. Бұл баптар бойынша ол 20 жылға дейін сотталуы мүмкін екені айтылған. Ал енді Трампқа қастандық жасамақ болғаны дәлелденсе, өмір бойына бас бостандығынан айырылуы ықтимал.

Дональд Трамп АҚШ президентінің әкімшілігін Руттың ісін дұрыс жүргізбеді деп айыптап, оны Флоридадағы құқық қорғау органдарына тапсыруды сұрады.

Меррик Гарланд сейсенбіде журналистерге әділет министрлігі заң аясында мемлекеттік органдармен ынтымақтасатынын айтып, айыптауларды жоққа шығарды.

Естеріңізге сала кетсек, 15 қыркүйекте экс-президент Трамптың күзетінің қызметкері гольф-клубтың қоршауы маңындағы бұталардың арасында біреу қару кезеп отырғанын байқап қалған. Бұл кезде Трамп гольф ойнап жүрген.

Күзетші бірден оқ жаудыра бастаған соң қарудың иесі автоматын тастап, қашып кетеді. Біраз уақыттан кейін полиция оның көлігін көрші округ жолында тоқтатып, қамауға алды.

Руттың қатысуымен өтетін бірінші сот отырысы 30 қыркүйекке жоспарланған.

Осы оқиғадан екі ай бұрын Пенсильваниядағы митинг кезінде Трамқа 20 жастағы Томас Мэтью Крукс қастандық жасаған болатын.

Материал ВВС ақпараты негізінде дайындалды

Фото: Getty Images