Зеленский БҰҰ-ның Бас Ассамблеясының сессиясына қатысады

Украина президенті Владимир Зеленский БҰҰ Бас Ассамблеясының сессиясына қатысу үшін Нью-Йоркке келді. Бұл туралы Украинформ мемлекеттік ақпарат агенттігі хабарлады.

Зеленскийдің Нью-Йорктегі БҰҰ-ға сапары Джо Байден әкімшілігінің Украинаға 375 миллион долларға жаңа әскери көмек пакетін дайындап жатқан кезге тұспа-тұс келіп тұр. Бұл сома Киевке бұрын берілген бірнеше көмек пакеттерінен асып түспек.

Президент Джо Байденмен және вице-президент Камала Харриспен кездесулер бейсенбіге жоспарланған екен. Онда Зеленский Украинаның Ресейге қарсы соғысындағы «Жеңіс жоспарын» ұсынады.

Сонымен қатар ол Республикалық партияның президенттігіне кандидат Дональд Трамппен кездеспек. Айта кетсек, Трамп АҚШ-тың шығыс-еуропалық одақтасына көрсетіп отырған көмегін «ақшаны босқа ысырап ету» деп сипаттап, Украинаның жеңісін қалайтынын айтудан бас тартты. Трамп осы аптада Зеленскиймен кездесетінін айтты, бірақ нақты күні әлі жарияланған жоқ.

Зеленский ұзақ уақыт бойы қару-жарақ тапшылығына шағымданып жүр, оның ішінде Скрантон зауытында жасалған 155 мм артиллериялық снарядтар да бар. Бұлай алаңдауы орынды десе болады, өйткені Ресей қыс қарсаңында елдің энергетикалық инфрақұрылымына соққы беріп жатыр.

Көмек пакетіне патрульдік қайықтар, дүркіндетіп ату реактивті жүйелеріне арналған қосымша оқ - дәрілер (HIMARS), 155 және 105 мм артиллериялық оқ-дәрілер, қосалқы бөлшектер және басқа да қару-жарақ кіреді. Бұл туралы Ақ үйдің екі өкілі жұма күні Reuters агенттігіне хабарлады.

Пакеттің құрамы мен мөлшері президент Байден қол қойғанға дейін жақын күндері өзгеруі мүмкін.

Фото: golosameriki.com