Шарын, Көлсай мен Алтын Емел жерлері кімдерге берілді?

Malim Админ

  • 14.04.2021

"Көлсай көлдері", "Шарын" және "Алтын Емел" ұлттық табиғи парктері "туризм мен рекреация қызметін дамыту мақсатында" үш инвесторға ұзақ жылға пайдалануға берілді. Бұл туралы экология, геология және табиғи ресурстар министрлігі хабарлады. Министрлік инвесторлар үш табиғи паркке 14,5 миллиард теңге құяды дейді.

Министрліктің хабарлауынша, табиғи парктердегі аумақты ұзақ жылға пайдалануға алу байқауына алты өтініш келіп түскен. Байқау нәтижесінде мына компаниялар жеңген:

"Шарын" ұлттық паркі бойынша – "Таунтон Плюс" ЖШС құрамындағы консорциум атынан QazaqGeography республикалық қоғамдық бірлестігі;

"Көлсай көлдері" бойынша – "Атырау-Рент" компаниясы;

"Алтын Емел" бойынша Asemtal компаниясы құрамындағы консорциум атынан QazaqGeography республикалық қоғамдық бірлестігі.

Министрлік инвесторлар "Шарын" ұлттық паркіне – 4,5 млрд теңге, "Көлсай көлдеріне" – 5 млрд теңге, "Алтын Емелге" – 5 млрд теңге жұмсайды деп мәлімдеді. Алайда министрлік үш ұлттық табиғи парктің жерлері қанша уақытқа инвесторға берілгенін ашып айтпаған.

Министрлік мәліметінше, "тендер құжаттары үш табиғи парктің сайттарында" орналастырылды. "Алтын Емел" ұлттық табиғи паркі сайтындағы мәліметке қарағанда, тендер нәтижесінде парктің әртүрлі аумағындағы жалпы 12,1 гектар жер инвесторға ұзақ жылға пайдалануға берілді. Бұл аумақ Asemtal компаниясы құрамындағы консорциум атынан QazaqGeography республикалық қоғамдық бірлестігіне пайдалануға берілді.

Ашық деректерге қарағанда, Asemtal компаниясының жетекшісі әрі құрылтайшысы Юрий Гагарин. 2015 жылы Алматыда тіркелген компания тұрғын үй ғимараттарын салумен айналысады. Ашық дерекке сенсек, Asemtal асып кетсе 5 адам жұмыс істейтін шағын компания. Юрий Гагарин бұдан өзге тағы төрт компанияға жетекшілік етеді.

"Таунтон Плюс" ЖШС құрамындағы консорциум атынан QazaqGeography республикалық қоғамдық бірлестігі "Шарын" ұлттық табиғи паркінің қандай аумағын және қанша жылға алғаны белгісіз. "Шарын" табиғи паркінің сайты ашылмай тұрғандықтан, тендер құжаттарын көру мүмкін болмады. 2001 жылы Алматыда тіркелген "Таунтон Плюс" ЖШС да тұрғын үй ғимараттарын салумен айналысады. Құрылтайшысы – Полякова Елена Владимировна.

Осы екі тендерде аты аталған QazaqGeography республикалық қоғамдық бірлестігі 2013 жылы Кәрім Мәсімовтің бастамасымен және қолдауымен құрылғаны бірлестік сайтында көрсетілген. Мәсімов QazaqGeography республикалық қоғамдық бірлестігі қамқоршылар кеңесінің төрағасы, ал премьер-министр Асқар Мәмин осы бірлестіктің төрағасы. Ашық деректерге қарағанда, QazaqGeography республикалық қоғамдық бірлестігінің 10 құрылтайшысы бар. Олардың басым бөлігі әртүрлі университеттің профессорлары.  Мысалы, құрылтайшылардың бірі Қанат Байғарин Nazarbayev университетінде вице-президент болған, Орденбек Мазбаев та бірқатар ұлттық университетте профессор қызметін атқарды, Күлжиһан Жанәлиева да Мазбаевпен бірге Еуразия ұлттық университетінің профессорлық құрамында, Мейрамгүл Құсайынова Nazarbayev университетінің қауымдастырылған профессоры, Диас Тастанбеков әл-Фараби атындағы ҚазҰУ оқытушысы, химик-ғалым, Мамашев Мақсат Талғатұлы бір кездері Nazarbayev университеті атқарушы кеңесінің төраға орынбасары қызметінде болған. QazaqGeography-дің өзге құрылтайшылары: Руслан Уразалиев, Гүлжан Ермекова, Рүстем Болат және Вероника Дашкова.

Ал "Көлсай көлдерінің" 17 гектар жерін пайдалануға алған "Атырау-Рент" компаниясы 2005 жылы Атырауда тіркелген. Құрылтайшысы – Гүлсара Аленова, ал жетекшісі – Бауыржан Махметов есімді азамат. Компания туристік қызмет және мүлікті жалға беріп, басқарумен айналысады деп көрсетілген. Қызығы, "Атырау-Рент" мекенжайында басқа 19 компания тіркелген. "Атырау-Рент" те асып кетсе бес адам жұмыс істейтін компания.

Ұлттық табиғи парк жерлері "туризмді дамыту" деген желеумен бұған дейін де жалға берілген. Былтыр Іле Алатау ұлттық табиғи паркінің 35 гектар аумағы 49 жылға "Құлтау және К" компаниясына берілген. Ras Aitamyn Telegram-арнасы бұл компанияның жетекшісі Александр Гужавин офшордағы компанияның директоры екенін анықтаған.

Наурыз айының аяғында Іле Алатау ұлттық табиғи паркінің 187 гектар жері жалға берілетіні хабарланды. Алайда экология министрлігі тендер құжаттарында техникалық ақау кетті деген себеппен бұл хабарламаны алып тастады.

 

 

Байланысты жаналықтар

Жазушы Кәрім Мәсімовтің 4 кітабы. Біреуі тіпті құпия...

26.10.2021

Мәсімовті қолдап жүрген кімдер?

13.04.2022

Министр Берекешевтің кері кетуі немесе кіші көлдің үлкен дауы

14.10.2021

Мәсімов пен Байден кездесуі сөз болып жатыр

18.06.2021

Әбдірахымов пен Мәсімовке "алаяқтық" бойынша айып тағылды

08.06.2022

Британдық басылым: "Қазақмыс" Мәсімовтің отбасын Парижде қыдыртты

10.09.2020
MalimBlocks
Жазушы Кәрім Мәсімовтің 4 кітабы. Біреуі тіпті құпия...

Мұндай еңбекті 700 жазушысы бар Жазушылар одағынан осы күнге дейін жазбаған

Мәсімовті қолдап жүрген кімдер?

Желіде «Мемлекеттік төңкеріс жасамақ болды» деген күдікке ілініп қамауда отырған Ұлттық Қауіпсіздік комитетінің бұрынғы төрағасы Кәрім Мәсімовті қолдау сайты пайда болды. Онда Мәсімовті Қазақстан модернизациясы архитекторларының бірі деп сипаттап, оның ел үшін істеген еңбегімен қатар не үшін қамалып отырғаны туралы ақпарат жарияланған.

Министр Берекешевтің кері кетуі немесе кіші көлдің үлкен дауы

Экология министрлігі Талдыкөлге қатысты ұстанымынан неге ауытқып кетті?

Мәсімов пен Байден кездесуі сөз болып жатыр

Әбдірахымов пен Мәсімовке "алаяқтық" бойынша айып тағылды

Британдық басылым: "Қазақмыс" Мәсімовтің отбасын Парижде қыдыртты