Оқу-ағарту министрлігі мектеп түлектеріне бітіру кешін өткізбеуге не себепті кеңес беретінін түсіндірді, деп хабарлайды Malim.kz.
Оқу-ағарту министрінің орынбасары Шынар Ақпарованың айтуынша, мұндай ұсыным жыл сайын беріледі.
«Бітіру кештерін мектепте немесе басқа жерлерде өткізуді ұсынбаймыз. Өйткені балаларымыз кәмелетке толмаған. Ең алдымен ата-аналарға және олардың саналылығына сенеміз, себебі, Құдай сақтасын, олардың балаларына бірдеңе болып қалмасын дейміз», – деді Ақпарова.
Оның сөзінше, министрлік, білім департаменттері, мектеп әкімшілігі және ата-аналар бірлесіп, балалар үшін қауіпсіздікті бірінші орынға қоюы керек.
«Сондықтан оқу-ағарту министрлігімен, білім департаментімен, мектеп әкімшілігімен, соның ішінде ата-аналармен бірлесіп, балаларға ешқандай іс-шаралар ұйымдастырмауға кеңес беруіміз керек», – деді министрдің орынбасары.
Шенеунік бұған дейін осындай кештерден кейін кәмелетке толмағандардың қатысуымен жол-көлік оқиғалары тіркелгенін де атап өтті.
Сонымен қатар, министрлік бітіру кештеріне кететін артық шығынға да назар аударды.
«Біз бәріміз балалардың бойында өмірде қолдана алатын қасиеттерді тәрбиелеуіміз керек. Ата-аналарының ақшасына қандай да бір ойын-сауық іс-шарасына қыдырғандары кейінірек ұмытылады. Әсіресе ата-аналар бұған сонша шығындалады. Сондықтан оқу-ағарту министрлігі мұны құптамайды», – деді Шынар Ақпарова.
