Семей қаласының дәрігері басшылығына наразы. Коронавируспен күресіп жүрген дәрігерлер үкімет уәде еткен ақшаны алмаған. Бұл туралы Tengrinews.kz. сайты жазды.
Атын жасыруды қалаған медқызметкер Семей қаласының жедел медициналық көмек ауруханасының реанимация бөлімінде жұмыс істейтінін айтқан. 8 шілдеде бұл аурухананы коронавируспен ауырғандарды қабылдайтын стационарға айналдырған.
«Біз коронавируспен ауырғандарды емдедік, қазір де емдеп жатырмыз. Реанимацияға қауіпі жоғары науқастар түседі. Бізді мәжбүрлі түрде жұмысқа шығарды, таңғы сегізден кешкі сегізге дейін істейміз.
Бізге уәде етілген 425 мың теңгені төлеген жоқ. Тынбай жұмыс істедік, сондағы төлегендері 30-35 мың теңге. Санитарларға, тіпті, 15 мың теңге төледі.
Әр күн жұмысқа үлкен қорқынышпен барамыз. Мүмкін мен де сол ауруға шалдығып қалармын деген ой маза бермейді. Күнде сегізде жұмысқа бара жатқанда қауіпті аймаққа кіретініңді ойлайсың.
Коронавирустан адам қайтыс болғанда, өзіңді құтқара алмадым деп кінәлайсың. Бірақ жасанды тыныс алу аппараттары жетпегендіктен өліп жатыр ғой. Ауруханадағы ахуалды айтпай-ақ қояйын.
Арнайы киімді киіп жүрудің өзі қаншалықты шаршататынын білсеңіз. Бізге бір ғана нәрсе керек. Жұмысымызға лайық ақша төлесін», – дейді дәрігер.
Шығыс Қазақстан облысының денсаулық сақтау басқармасы аталған жәйт бойынша тексеріс жүргізетінін айтқан.
