«Гладиатор 2» көш бастап тұр
Африкаға кеткен ұлдың Рим империясы әскерінің шабуылынан қолға түсіп, өз отанынан құл болып оралуы, гладиаторға айналып, талай жекпе-жекте жеңгені туралы өрбиді
Киноөндірісі қырауар ақша табудың көзі десек, қателеспейміз. Соңғы бір аптада еліміздегі кинотеатрларда көрсетілген кинолар қанша қаржы жинады? Осыған қысқаша шолу жасап көрейік. «Курсив» порталының жазуына қарағанда, «Гладиатор 2» фильмі қазақстандық көрермендердің көңілінен шыққан.
«Гладиатор 2» – 308 752 197 теңге пайда тапқан.
Біз бұрын «Гладиатор» фильмінің әлемді қалай жаулағанын білетінбіз. Ол кезде де көп қаржы жинаған Голливуд фильмі қазір бүкіл әлемнің көрермендерін таңғалдырып жатыр. Бас-аяғы 2,5 сағатқа созылатын
туынды аты аңызға айналған Максимус Децим Меридиустың оқиғасын ары жалғайды. Бұл жолы сахнаға оның ұлы шығады. Сюжет әкесінің өлімінен кейін қуғынға түсіп, Африкаға кеткен ұлдың Рим империясы әскерінің шабуылынан қолға түсіп, өз отанынан құл болып оралуы, гладиаторға айналып, талай жекпе-жекте жеңгені туралы өрбиді. Әділдік жолында күресіп, ақыры тақты қайтарып алады. Шымыр сюжет, қызықты оқиға, экшнге толы түсірілім көрерменін өзіне баурап отыр.
«Шекер: Соңғы мүмкіндік» – 160 782 440 теңге.
Бұл фильм 7 қарашада прокатқа шыққан. Алғашқы аптада өзге фильмдерден көп қаржы тапқан. Тек «Гладиатор 2»-ден «жеңілді». Оқиға есірткі бизнесі жайында. Бас кейіпкер есірткі тасымалын ұйымдастырып, ақыры қақпанға түседі. Түрмедегі азапты өмірі, бостандыққа шыққан соңғы аянышты халі нанымды суреттелген. Бүгінгі күннің тақырыбы болғандықтан да, көрермендер сұранысына ие болып отыр.
«Миссия: Қызыл» – 110 442 319 теңге
Бұл жеңіл әзілге құрылған фильм. Экшн жанры жастарды өзіне баурайды. Фильмде ондай сәттер көп. Қазір фильмді тамашалаушылар легі толастар емес. Танымал актер Дуэйн Джексонның фильмге қатысуы да сұранысты арттырған.
«Кеттік, бәрін таста» – 84 071 390 теңге
Отандық фильмнің көрермені де аз емес. Актер болуды көксеген екі достың тағдырын қамтыған фильмде қызықты оқиғалар көп. Шетел асып, құлдыққа түсуі, достық пен адалдықтың арасалмағы көрермендеріне ой салады. Олардың әзілдері мен қиындықтары бірде күлдіріп, бірде мұңайтуы мүмкін.
«Нұрикамал» – 83 673 382 теңге
Шынайы оқиғаға, белгілі ақын Ханбибі Есенқарақызының отбасындағы жағдайға және «Нұрикамал» әнінің туу тарихына арналған фильм де көрерменге түрлі ой салды. Қаржы жинау көрсеткіші бойынша 5-орында келеді.
Фото: www.championat.com
