«Өмір түгіл өзімді де білмеймін». Әнші Бауыржан Исаевқа сахнаға шығуға шектеу қойылған

«Өмір түгіл өзімді де білмеймін. Сені ойласам төзімді де білмеймін» деп әндетіп, елге танымал болған әнші Бауыржан Исаев «ХабарLike» бағдарламасында тыңдармандарына жан сырын ақтарды, деп хабарлайды Malim.kz.

Өнер иесі өзінің шығармашылығына шектеу қойылып, сахнадан алшақтап кеткен сәтін еске алды.

Бүгін алғаш рет айтайын деп жатырмын. Бұл ақпаратты сіздерге жеткізгім келеді. Негізі 2000 жылдары менің шығармашылығыма ресми түрде шектеу қойылған болатын. Енді ол кісілердің атын атамасам да болады. Олар бірнеше жыл бұрын дүниеден озды. Сол кезде ресми түрде Бауыржан Исаевтың шығармашылығына шектеу қойылып, кәдімгідей тыйым салынған. Бүкіл өңірлерге, облыс әкімдеріне хабарласып, менімен жұмыс істемеу туралы бұйрық шығарған еді, - дейді ол.

Әншінің айтуынша, ресми бұйрықтан кейін концерттерге шақырмайтын болған.

Сондықтан мені концерттерге шақыруды қойды. Одан бөлек Қазақстандағы радио және телебағдарламалардан менің әндерім мен бейнебаянымды алғызып тастады. Сол кісілердің дәурені жүріп тұрған кезі ғой. 3-4 жылдай сахнаға шыға алмай жүрдім. Одан кейін Түркістан қаласында жүргенімде марқұм Арман Дүйсенов ағамды кездестірдім, - дейді Бауыржан Исаев.

Ол марқұм композитор Арман Дүйсенов қолдау көрсеткенін атап өтті.

Арман ағамыз Алматы қаласына көшкен соң, «Бауыржан, не болса да халқың сені жақсы көреді, сағынады, күтеді. Саған 10-15 жаңа ән жазып берем, жаңа альбом шығарамыз», - деп үлкен қолдауын көрсеткен еді. 7-8 жыл бойы Арман ағамен тығыз шығармашылық байланыста болдық. 2012 жылы менің екінші күйтабағым шықты. Сол күйтабаққа енген 17 әннің 14-ін Арман Дүйсенов жазған, - дейді әнші.

Фото: Видеодан скрин