Танымал актердің бейіті табылмай жатыр
Қазіргі жас буын өткен ғасырдың жетпісінші-сексенінші жылдары Қазақстанның театр мен кино кеңістігінде ЖЕКСЕН ҚАЙЫРЛИЕВ деген актердің болғанын білмейді... Бұл туралы театр режиссері Асхат Маемиров жазды.
«Оның есімі белгілі кинорежиссер А.Қарсақбаев түсірген «Алты жасар Алпамыс» фильміндегі басты кейіпкерлердің бірі - Мұғалім бейнесімен көзі қарақты көрерменге танылды.
Қаладан оқу бітіріп ауыл мектебіне жас ұстаз болып келген жігіттің бейнесін өте шынайы сомдады. Қаншама бозбала Жексен Қайырлиев кино экранда жасаған Мұғалім бейнесіне еліктеді.
10-нан астам фильмге түскен Ж.Қайырлиев - 1974 жылы актерлік студияны бітірген соң, бірден М.Әуезов атындағы театрдың құрамына қабылданды», деп еске алады Асхат Максимұлы.
Жексен Қайырлиев 1974-2000 жылдар арасында М.Әуезов атындағы театр сахнасында актер болып еңбек еткен.
Қазақ сахна өнерінің қара шаңырағында Ғ.Мүсіреповтің "Қозы Көрпеш - Баян сұлуында" - Қозы, М.Әуезовтің "Қарагөзінде" - Нарша, "Абайында" - Мағауия, "Қара қыпшақ Қобландысында" - Шуақ, Н.В.Гогольдің "Ревизорында" - Хлестаков, Қ.Мұхамеджановтың "Біз періште емеспізі" қойылымында - Марат секілді жиырмадан астам бейнелерді сомдады.
Қазақ радиосындағы жастарға арналған ең танымал "Сәлеметсің бе, замандас" бағдарламасында диктор Сауық Жақановамен бірлесіп жүргізген.
«Жүрегі "Өнер" деп соққан азаматтың өмірде де, театр әлемінде де достары аз болғанын замандастары айтып берді.
Жеке өмірі драмаға толы болған актёр Жексен Қайырлиев ауыр науқасқа шалдығып, туған жері Атырауда 2011 жылы, 12 мамырда дүниеден өтеді.
Атыраудың іргесіндегі Теңдіктегі қорымға жерленген.
Атырауға барған сапарымда Теңдіктегі қорымға бардым. Қорым өте үлкен болғандықтан Жексен ағамыздың бейітін ұзақ іздеп таба алмадым. Егер, Жексен Қайырлиевті танитындар болса бейітін табуға көмектессеңіздер екен»,- дейді Асхат Маемиров.
Самое читаемое
