Денсаулық пойызы Шығыс Қазақстанға ат басын тіреді

Шалғай елді мекендердегі халықтың денсаулығын жақсартып, қоғамның әл-ауқатын арттыруға бағытталған «Саламатты Қазақстан» әлеуметтік денсаулық пойызы тамыздың соңында Шығысқа ат басын тіреген болатын.

Ең бірінші Тишинская станциясына тізгін тартып, Риддер тұрғындарын қабылдаған жылжымалы медициналық кешен 2 қыркүйекте Алтай ауданындағы «Алтай» станциясына тоқтады. Мұнда алғашқы күні дәрігерлерден кеңес алып, диагностикадан өту үшін 120 адам келген.

Медициналық көмектен бөлек «Алтай» станциясында Мәдениет және ақпарат министрлігінің Роза Бағланова атындағы «Қазақконцерт» мемлекеттік академиялық концерттік ұйымы мен Алтай ауданының шығармашылық ұжымдары бірлескен концерттік бағдарлама өткізіп, алтайлықтардың көңілін бір көтеріп тастады.

Қайырымдылық концерті Мәдениет және ақпарат министрлігі, Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссия және Алтай ауданы әкімдігінің қолдауымен ұйымдастырылып отыр.

Пойыз ары қарай келесі станцияларда тоқтап, тұрғындарды қабылдайды: 6 қыркүйекте – Бұқтырма, 8 қыркүйекте – Күмістау, 10 қыркүйекте – Таусамалы, 11 қыркүйекте – Өскемен-1. Денсаулық пойызы облыста 11 қыркүйекке дейін болады.

Айта кетсек, денсаулық пойызы 21 сәуірде жолға шыққан болатын. Медициналық бригада құрамында терапевтен бастап, хирург, педиатр, психолог, невропатолог, ультрадыбыстық дәрігер, жалпы практика дәрігері, рентгенолог, кардиолог, стоматолог, офтальмолог, отоларинголог, сүт безі онкологы, гинеколог және уролог мамандар бар. Пойыз соңғы үлгідегі заманауи диагностикалық құралдармен қамтамасыз етілген. Биыл мамандандырылған диагностикалық құралдар қатарына маммография аппараты қосылып отыр.

Фото: Алтай ауданының ішкі саясат бөлімі