Денсаулық сақтау министрлігі балалардың тамақтану стандартын жаңартпақ

«Ашық НҚА» порталында Денсаулық сақтау министрінің «Денсаулық сақтау және білім беру ұйымдарында тамақтану стандарттарын бекіту туралы» Денсаулық сақтау министрінің 2020 жылғы 21 желтоқсандағы № ҚР ДСМ-302/2020 бұйрығына өзгерістер енгізу туралы» бұйрығының жобасы жарияланды, деп хабарлайды Malim.kz.

Онда министрлік қауіпсіз, сапалы және теңгерімді тамақтануды қамтамасыз ету, сондай-ақ, білім беру объектілерінде тамақтануды ұйымдастыру механизмдерін жетілдіру мақсатында Бұйрық жобасын әзірлеген.

Құжаттың жаңалығы балаларды қауіпсіз, сапалы және теңгерімді тамақтанумен қамтамасыз ететін дұрыс тамақтануға қойылатын заманауи халықаралық талаптарды ескереді.

ДДҰ деректеріне сәйкес, зиянды тағамдарды тұтыну семіздік, қант диабеті, жүрек ауруы және қатерлі ісік сияқты созылмалы аурулардың 60%-дан астамына душар етеді. Мәселен, 6-9 жас аралығындағы қазақстандық балалардың 21%-ы артық салмаққа ие. Артық салмақ дертінің таралуы 2015-2020 жылдар аралығында 5%-дан аса өскен.

Түзетулердің басты артықшылығы – тұзды, қантты және майды тұтынуды азайту, көкөністер мен жемістерді (көкөністер мен жемістер кальцийге, темірге, фолий қышқылына және балалардың денсаулығын қолдайтын, иммундық жүйесін нығайтатын басқа дәрумендерге бай)  тұтынуды арттыру көзделген, деп жазылған министрлік мәлімдемесінде.

Тұз бен қантты тұтынудың жоғары деңгейі семіздік, қант диабеті, жүрек-қан тамырлары және онкологиялық аурулар сияқты жұқпалы емес аурулардың дамуының жетекші факторларының бірі болып табылады.

Осы құжатты қабылдау тамақтанудың қауіпсіздігін, сапасы мен қолжетімділігін қамтамасыз етуге бағытталған, сондай-ақ білім беру объектілерінде балаларды тамақтандыруды ұйымдастыруға бірыңғай талаптар белгілеуді көздейді, деп жазылған құжат мәтінінде.

Фото: uniface.kz