Шаруалардың жерін киіктен қорғау үшін қоршау тұрғызылмақ - БҚО әкімі
Айтуынша, шаруалардың шабындығы мен жайылым жерлерін қорғаудың басқа жолы жоқ
Шаруалардың жерін киіктен қорғау үшін қоршау тұрғызылмақ. Батыс Қазақстан облысының әкімі Нариман Төреғалиев Орталық коммуникациялар қызметінде Malim.kz тілшісінің сұрағына жауап берді.
Айтуынша, шаруалардың шабындығы мен жайылым жерлерін қорғаудың басқа жолы жоқ. Осы ретте республикалық бюджет арқылы субсидиялау көзделіп отыр. Ал, былтыр жайылымы мен шабындығын киік таптап кеткен шаруаларға ешқандай өтемақы төленбейтін көрінеді. Өйткені ондай ереже заңда көзделмеген.
"Былтыр шаруа қожалықтары киіктерден зардап шекті. Мал азығын немесе жайылым жерлерді киіктер тапап кетті деген ақпаратқа сәйкес есептер шығарылды. Осы киіктерден зардап шегуіне байланысты шаруаларға өтемақы төлеу жөніндегі мәселе көтерілді. Осы мәселемен ауыл шаруашылығы министрлігімен арнайы жолықтық. Өңірге келіп, шаруа қожалықтарымен кездесті. Оларға өтемақы берілмейтіні түсіндірілді. Себебі оған арнайы ереже бекітілу керек. Сол жерде өтемақы төлеудің жолдары көрсетілу қажет. Биыл да бұл мәселе көтеріліп жатыр. Сондықтан болашақта ауыл шаруашылығы министрлігімен бірігіп сол шаруа қожалықтарының жерлерін қоршауға қатысты жұмыстарды жоспарлап жатырмыз. Яғни, республикалық бюджеттен субсидиялауды осы министрлікпен ақылдасып шешу жөнінде жұмыстар атқарылып жатыр. Қазір оған ереже дайындалуда. Сол ережеге сәйкес өздерінің егіс алқаптары мен жайылым жерлерін қоршайтын болады. Өтемақы төлеу туралы ешқандай қаржы бөлінген жоқ,-деді облыс әкімі Нариман Төреғалиев.
Фото: Ортком
