Шымкент экспортына үлкен мүмкіндік ашылмақ
Бүгінде Шымкентте машина жасау, металлургия, тамақ өнімдерін өндіретін, жеңіл өнеркәсібінде, фармацевтика және құрылыс өнімдерін өндіруде 35 белсенді экспорттаушы компания жұмыс істеп тұр. Өткен жылы бұл компаниялардың экспортқа шыққан дайын (шикізат емес) өнімдерінің құны 352,5 млн. АҚШ долларына жеткен. Қала әкімдігі осы бағыттағы жұмысты одан әрі жандандырып, экспорттаушы компаниялардың қанатын кеңге жайғысы келеді.
Осы ретте бүгін Шымкент қаласы әкімдігі жанындағы Экспорт жөніндегі кеңес отырысы өтті.
Онлайн форматта өткен жиынға «QazTrade» сауда саясатын дамыту орталығы және «Kazakh Export» экспорттық сақтандыру компаниясы, «Атамекен» ҰКП мен аудан әкімдері, Шымкент қаласының 35 ірі экспорттаушы кәсіпорындары қатысқан. Жиында отандық өнімдер экспортының әлеуетін арттыру, көлік шығындарын өтеу, экспорттаушыларды қолдаудың жай-жапсары талқыланған. Қала әкімінің орынбасары А.Сәттібаев экспорттаушыларды қолдаудың мемлекеттік шараларын кеңейту және оларды бір терезеге шоғырландыру қала өндірушілеріне елеулі қолдау көрсететініне сенім білдірді. Бұл экспорттық желіні кеңейтіп, сыртқы нарықтардағы отандық өнім көлемін арттыратынын баса айтты.