Қазақстанның әйелдер арасындағы екінші ракеткасы Юлия Путинцева Италия астанасы Рим қаласында өтіп жатқан WTA 1000 санатындағы турнирдің алғашқы айналымында жеңіліп қалды, деп хабарлайды Malim.kz.
Отандық теннисшінің қарсыласы әлемдік рейтингте 48-орында тұрған чехиялық Тереза Валентова болған еді. Екі сетке созылған матч 3:6, 2:6 есебімен Путинцеваның жеңілісімен аяқталды.
Кездесу 1 сағат 20 минутқа созылды. Осы уақыт ішінде Путинцева бір эйс жасап, үш рет қос қателікке жол берді. Сондай-ақ ол төрт брейк-пойнттың тек біреуін ғана тиімді пайдаланды.
Осылайша, Юлия Путинцева турнирдегі өнерін бірінші айналымда аяқтады. Ал Тереза Валентова келесі кезеңде әлемнің төртінші ракеткасы Коко Гауффпен кездеседі.
