Былтыр есірткі құралдары айналымына қатысы бар 226 медицина қызметкері жауапқа тартылған – ІІМ
Олар «Дәрмек» шаралары барысында анықталған
2024 жылы Ішкі істер органдары «Дәрмек» жедел алдын алу іс-шарасын 3 рет өткізіп, есірткі заттарының заңды айналымы саласында 38 қылмыстық және 633 әкімшілік құқық бұзушылықты анықтады, деп хабарлайды Malim.kz.
ІІМ есірткі қылмысына қарсы іс-қимыл комитеті төрағасының орынбасары Қуандық Әлжановтің сөзінше, оның ішінде заңсыз фармацевтикалық қызметтің 46 дерегі, дәрілік заттардың айналымы мен ережелердің бұзылуының 260 дерегі анықталған. Нәтижесінде 500-ден астам лауазымды тұлға, оның ішінде 226 медицина қызметкері әкімшілік жауапкершілікке тартылған.
Мәселен, Түркістан облысында 48 жастағы жүргізуші ұсталып, оның көлігінен полиэтилен пакеттері мен қораптар табылған. Тексеру кезінде дәріханадан жалған рецепт бойынша алынған 2500-ге жуық «трамадол» таблеткасы тәркіленген. Аталған препарат опиоидты топтағы есірткі заттарына жатады және арнайы тізімге енгізілген.
Фото: polisia.kz
