Көпбалалы отбасы балаларына төлемақы бермеген колледждер анықталды

Балқаш қаласының прокуратурасы көпбалалы отбасынан шыққан студенттерге және басқа қалалардан келген студенттерге өтемақы төлеуде заңбұзушылықтар болғанын анықтады.

Тексеру барысында Балқаш қаласының прокуратурасы екі колледж көпбалалы отбасынан шыққан студенттерге тиісті өтемақы бермегенін анықтады.

Заңға сәйкес мемлекеттік тапсырыс бойынша оқитын көп балалы отбасынан шыққан студенттер, жан басына шаққандағы орташа табысы мемлекет белгілеген деңгейден аспаса, тегін ыстық тамақпен қамтамасыз етілуге құқылы.

Ыстық тамақ берілмеген жағдайда колледждер студенттерге білім басқармасы белгілеген тамақ құны көлемінде өтемақы төлеуге міндетті.

Қабылданған қадағалау шараларының нәтижесінде көпбалалы отбасынан шыққан студенттерге жалпы сомасы 4,7 млн теңге өтемақы аударылды.

Мемлекеттік критерийге сәйкес келетін барлық студенттерге тиісті төлемақы бұдан әрі тұрақты негізде аударылады.

Сонымен қатар, басқа жерде тұратын, алайда Балқаш қаласындағы колледжде оқитын студенттердің қысқы және жазғы демалыс кезіндегі жолақы өтелуі керек.

Тексеру барысында колледждердің басқа жерде тұратын студенттерге қысқы кезеңде қажетті өтемақы төлемегені анықталды.

Прокурорлық қадағалау нәтижесі бойынша бір миллион теңгеден астам төлем толығымен аударылды. 

фото: Nur.kz.П.Карандашов