Абай облысында ер адам өзіне қол салмақ болған

Абай облысында полицейлердің көпірде жігітті құтқарған сәті видеоға түсіп қалды, - деп хабарлайды Malim.kz тілшісі. 

4 сәуірде полицияға үрейлі хабарлама келіп түсті: өтіп бара жатқан адамдар көпірден бір жігіттің секіруге дайындалып тұрғанын байқаған.
Оқиға орнына патрульдік полиция экипаждары дереу жетті. Алғашқылардың бірі болып полиция қызметкерлері Нұржан Оралтаев пен Нұрсұлтан Айып жігітке жақындады. Олар үйлесімді әрекет етіп, екі жақтан жігітті әңгімеге тартып, назарын өздеріне аударып, қауіпті әрекеттің алдын алуға тырысты. Осы кезде басқа полицейлер жолдағы қозғалысты реттеп, көпір үстінде көлік кептелісін болдырмауға күш салды.

Жігіт сәл алаңдаған сәтте, тәртіп сақшылары оны шапшаң түрде қолынан ұстап, қауіпсіз аймаққа сүйреп шығарды. Қарсылық көрсеткеніне қарамастан, полицейлер оны ұстап қалып, психологиялық қолдау көрсете берді.

Уақытылы әрекет пен кәсіби шеберліктің арқасында полицейлер 25 жастағы ер адамның өмірін сақтап қалды. Ол емдеу мекемесіне жеткізілді.

Фото: Абай облысы ПД