Оралда полицейлер төртінші қабаттан секірмек болған әйелді құтқарып қалды, - деп хабарлайды Malim.kz тілшісі.
25 сәуірде түнде Орал қаласының полиция басқармасының "102" арнасына Кердері көшесінде әйел адамның көпқабатты үйдің төртінші қабатындағы балконнан секірмек болғаны туралы хабарлама түсті.
Оқиға орнына бірден патрульдік полиция экипаждары жетті. Полиция қызметкерлері жағдайды жедел бағалап, кәсіби әрі үйлесімді әрекет етті. "Полиция капитаны Райымбек Газезов төменде қалып, әйелмен дауыс арқылы байланыс орнатып, оның назарын басқа жаққа аударды. Ал полиция капитаны Берік Сиязбаев, полиция лейтенанты Фархат Ғалиев және полицияның аға лейтенанты Мирас Каримуллин үшінші қабатқа көтеріліп, балкон арқылы төртінші қабатқа өтіп, әйелді дер кезінде ұстап үлгеріп, қайғылы жағдайдың алдын алды", - делінген хабарламада.
Полицейлердің жедел әрі батыл әрекеттерінің арқасында әйелдің өмірі аман қалды.
Полиция азаматтардың өмірі мен қауіпсіздігін сақтау құқық қорғау органдарының басты міндеттерінің бірі екенін еске салады және өзгенің қайғысына бей-жай қарамауға шақырады.
Фото: polisia.kz
