Қазақстандық әйел Сирияға кетіп, қыздарын лаңкестерге тұрмысқа бермек болған

Астанада әйел экстремистік материалдарды таратқаны және террористік топқа қосылуға әрекеттенгені үшін сотталды, - деп хабарлайды Malim.kz тілшісі елордалық прокуратураға сілтеме жасап.

Полиция қызметкерлері әйелді Түркия арқылы Сирияға ұшып кетуге әрекеттенген кезінде Алматы әуежайында ұстаған.

Сот әйелдің Telegram-мессенджерін діни себептермен қарулы қақтығыстарға қатысқан адамдардың әрекеттерін мақұлдайтын хабарламаларды жариялау үшін пайдаланғанын анықтады. Сондай-ақ, ол кәмелетке толмаған екі қызын террористік ұйымдардың мүшелеріне күйеуге беру мақсатымен Сирияға бару ниетін талқылаған.

Прокурор сотқа айыпталушының телекоммуникациялық желілерді пайдалана отырып, терроризмді насихаттауға және террористік топтың қызметіне қатысуға дайындалғанын дәлелдейтін айғақтарды ұсынды.

Сот үкімімен әйел жеті жылға бас бостандығынан айырылды.

Елордалық прокуратура террористік топ құру, оған басшылық ету және оның қызметіне қатысу үшін 17 жылға дейін бас бостандығынан айыру және мүлкін тәркілеу жазасы қарастырылғанын еске салады.

Терроризмді насихаттағаны немесе террорлық актілер жасауға жария түрде шақырғаны үшін 12 жылға дейін бас бостандығынан айыру және мүлкін тәркілеу жазасы қарастырылған.

Айта кетейік, бұған дейін Ұлттық қауіпсіздік комитеті жыл басынан бері Қазақстанда терроризмді насихаттағаны үшін 34 адам, соның ішінде екі шетелдік адамның сотталғанын хабарлаған еді.

Фото: Pixabay.com