«Әрбір қызға Айтбектей аға керек». Адвокат Жанна Оразбақова үндеу жасады
Ол тұрмыста зорлық-зомбылық құрбаны болған қыздарды қолдау керек дейді.
Бишімбаев ісінде Нүкеновтердің мүддесін қорғаған адвокат Жанна Оразбақова Курсив Медиаға берген сұхбатында Бишімбаев ісі қоғамға қандай өзгеріс әкелгенін айтты, деп хабарлайды Malim.kz.
Жанна Оразабақова Бишімбаевты жаңа Қазақстанның билігі кешірмейтінін атап өтті.
Бишімбаев бұрынғы биліктің тумасы. Назарбаевтың көмекшісі болған, соның командасынан шыққан. Бірінші қылмысының жазасын толықтай өтемеді. Ал қазір Президентіміз басқа. Сондықтан жазадан құтылып, кешірім алуы екіталай, - дейді адвокат.
Адвокат зорлық-зомбылыққа ұшыраған қыздарға отбасында қолдау көрсетілмейтініне тоқталды.
Жалған ақпараттарды кім таратып жүргенін білмеймін. Ол әлеуметтік желінің жұлдызы болатын адам емес. Өзінің жұмысы, хоббилары бар. Қарашадан бастап қарындасы үшін күреске қанша уақыт кетті. 11 қараша күні біз танысқан кезде әкесі мен ағасы үшін қатты жүрегім ауырды. Содан бастап «Салтанат ішкен, өзі басын соғып, ұйықтап қалған» деген жалған ақпарат таралды. Ол өзінің қарындасын қорғамақ ниетте халық алдына шықты. Ондай ағалар көп қыздарға жетпейді. Қаншама қыздар тұрмыстық зорлық-зомбылық болса да, шыдап жүре береді. Өйткені, ондай ағалары жоқ. Ата-аналары «Кетпе, шыда» дейді, ағалары «Отбасымыздың абыройын төгесің, кетпе», дейді. Сондықтан, қаншама қыз өліп жатыр. Қоғамымыз оянып, бәрін түсінгеніне сенемін. Шындық қайсы, өтірік қайсы екенін түсінді, - дейді адвокат.
Айта кетейік, адвокат Жанна Оразбақова алқабилер шығарған сот үкімімен толықтай келісіп отыр. Алайда, ол Салтанат Нүкенованың қайта тірілмейтінін, сол себепті бұл істе жеңімпаз жоқ екенін де айтқан.
Фото: Жоғарғы сот
