Ауғанстан әскерилері кезекті рет Өзбекстан шекарасын заңсыз кесіп өтпек болған.
Өзбекстан сыртқы істер министрлігі маусымның 28-і күні Ауғанстан армиясы мен халық күштерінің 47 сарбазы шекараны заңсыз кесіп өтпек болғанын мәлімдеді.
«27 маусымда Ауғанстан армиясы мен халық күштерінің 44 сарбазы Шортеп аумағында Өзбекстан мемлекеттік шекарасын заңсыз кесіп өтпек болды. Бір күн бұрын, 26 маусымда дәл осы аумақтан 3 бірдей Ауғанстан азаматы Өзбекстан аумағына заңсыз өтпек болған. Ұсталған Ауғанстан азаматтары елдеріне қайтарылды», - делінген Өзбекстан СІМ таратқан мәлімдемеде.
Бұдан бөлек, мәлімдемеде Өзбекстанның Ауғаныстанмен достық қарым-қатынас ұстанымда екендігін және ресми Ташкенттің көршілес елдің ішкі істеріне араласпайтындығы айтылған.
АҚШ аймақтан әскерін шығара бастағалы бері Ауғанстан әскерилерінің Өзбекстан шекарасын заңсыз кесіп өту фактілері жиілеген. Маусымның 23-і күні Ауғанстанның 53 қарулы шекарашысының көрші ел аумағына заңсыз өтіп кеткендігі хабарланған. Кейінен олардың арнайы тексерістен кейін елдеріне қайтарылғаны айтылған.
АҚШ Ауғанстан аумағынан әскерін шығаруды 2021 жылдың 11 қыркүйегінде аяқтайды. Қазір елде тұрақты армия мен Талибан арасында текетірес күшейген. Сарапшылар Ауғанстан армиясы өте әлсіз екенін және Талибан қозғалысына өздігінен төтеп бере алмайтынын айтады. Халықаралық ұйымдар осы уақытқа дейін АҚШ әскерімен бірлесіп жұмыс істеген ауған азаматтарының қауіпсіздігіне алаңдайды.
MalimBlocks
