Буча мәселесін БҰҰ қарау керек - Әшімбаев

«Бәріміз бұқаралық ақпарат құралдарынан да, әлеуметтік желілерден де Бучадағы және басқа да елді мекендерде болған жағдайды көріп жатырмыз. Бучадағы жағдай – үлкен трагедия. Украина тарапы геноцид деп айтып жатқанын естіп жатырмыз. Ал Ресей тарапы бұны істемегенін алға тартуда. Сол себепті халықаралық ұйымдардың аясында, БҰҰ ауқымында комиссия құрылады деген ойдамын. Сол комиссия объективті түрде жан-жақтан ақпаратты жинап, адамдармен кездесіп, сол жерге барып, халықаралық қауымдастыққа мәлімет бергені дұрыс. Бейбіт адамдар қаза болды. Сондықтан бұл жағдай «қалай болды, неге болды?» деген сұрақтар аясында халықаралық ұйымдардың қатысуымен анықталу керек», - деді Әшімбаев палатаның жалпы отырысынан кейін журналистерге берген жауабында.

Оқи отырыңыз: Украина Қазақстан үшін де соғысып жатыр - Арман Шораев

Сенат төрағасы мәселе халықаралық конвенциялар аясында қаралу керегін айтты. Қазақстанның осы жағдайға қатысты позициясына туралы сұраққа «Сыртқы істер министрлігінен сұрау керек» деп жауап берді. Және президенттің мақаласын алға тартып, «Украинаның территориялық тұтастығын сыйлаймыз», деді.

Оқи отырыңыз: Украинада тұратын қазақ: «Ұлым соғыста туды»

Айта кетейік, осыған дейін президент әкімшілігі басшысының орынбасары Тимур Сүлейменов Қазақстанның Қырымға және Донбассқа қатысты өзгерістерді мойындамайтынын және Украинаның тұтастығын сыйлайтынын айтқан еді. Кейіннен бұл сөзді Сыртқы істер министрлігі де растады.

Оқи отырыңыз: Зұлым орыс империясына ажал! - Алматы Украинаны қолдайды

Украинаның Киев облысы Буча қаласы бір ай Ресей әскерінің оккупациясында болған. 31 наурызда Ресей әскері қаладан кетіп, 1 сәуірде журналистер қалаға кіруге рұқсат алған. Қазірге дейінгі ақпаратқа сәйкес оккупация болған бір ай ішінде қалада 300-ден астам бейбіт адам ату жазасына кесілген. Олардың денесі қала көшелерінде шашылып жатқан. Украина қалада болған жағдайды геноцид деп атаса, Ресей өз әскерінің мұндай қылмысқа бармағанын және жағдайды Украинаның өзі ушықтырып отырғанын айтты.