Қамаудағы Сатыбалды «Қазақтелекомды» мемлекетке қайтарып беруге әзір
Қазір қамауда отырған Қайрат Сатыбалды «Қазақтелеком» ұлттық компаниясының акцияларын мемлекетке «сыйлауға» әзір. Бұл туралы елордада өткен брифингте «Самұрық Қазына» ұлттық әл-ауқат қорының төрағасы Алмасадам Сәтқалиев айтты.
«Қайрат Сатыбалды акцияларды үкіметке "сыйлауға әзір" екенін білеміз. Сосын үкімет ол акцияларды не "Самұрық Қазынаға", не басқа шешім қабылдайды. Біз үкімет шешімін құптаймыз», — деді Сәтқалиев.
Оқи отырыңыз: Қайрат Сатыбалдыдан Путинге дейін: «Қазақтелеком» кімдермен шарт жасасуда?
Айта кетейік, үкімет «Қазақтелеком» акцияларының 28,8 пайызын мемлекет иелігіне кері қайтару туралы шешім шығарған. Бұл акцияларды экс-президент Нұрсұлтан Назарбаевтың немере ісі Қайрат Сатыбалдының қарамағындағы Skyline Investment Company S.A және Alatau Capital Investment компаниялары үкіметтен алған болатын.
13 наурыз күні Қайрат Сатыбалды «қызмет бабын асыра пайдаланды» және «Қазақтелеком қаражатын талан-таражға салды» деген күдікпен ұсталып, сот шешімімен екі айға қамауға алынған. 12 сәуірден бастап, компанияның мемлекет меншігіне қайтарылатыны туралы ақпарат тараған.
Оқи отырыңыз: Мәсімовті қолдап жүрген кімдер?
Қайрат Сатыбалдыдан басқа экс-президентке жақын адамдар қатарынан Дариға Назарбаеваның экс-құдасы Қайрат Боранбаев пен бір кездері Нұрсұлтан Назарбаевтың «сенімді серігі» аталған Кәрім Мәсімов қамауға алынған.
