Қазақстан Сыртқы істер министрлігіне Ресей Федерациясының Уақытша сенімді өкілі Александр Комаровтың шақырылғаны хабарланды.
"Кездесу барысында Сыртқы істер министрінің орынбасары Марат Сыздықов Ресей Федерациясы Мемлекеттік Думасының Білім және ғылым жөніндегі комитетінің төрағасы Вячеслав Никоновтың Бірінші арнадағы «Қазақстанның территориясы - Ресей тарапынан үлкен сыйлық» деген сөзіне қатысты түсініспеушілік білдірді. Кейбір ресейлік саясаткерлердің Қазақстанға қатысты арандатушылық әрекеттерінің жиілеп кетуі мемлекеттеріміз арасындағы одақтастық қатынастарға айтарлықтай нұқсан келтіретіні атап өтілді" делінген СІМ таратқан мәлімдемеде.
Енді сенімді өкіл А.Комаров Кремельмен хабарласып, Ресейдің нақты жауабын айтуы керек. Біздің СІМ Ресей тарапының осындай мәлімдемелерге тиісті баға беруін күтуде және Ресей Федерациясының мемлекет қайраткерлерінен мұндай мәлімдемелерге жол бермеу үшін шаралар қабылдауға шақырған. Сондай-ақ, Ресейлік дипломатқа ҚР СІМ ұстанымы көрсетілген нота табысталды.
Бұл дау қайдан шықты? Кеше Ресей мемлекеттік «Первый канал» телеарнасында дума депутаты Вячислав Никонов "Қазақстан территориясы – Ресейдің берген сыйлығы" деген болатын. Ол «Большая игра» бағдарламасында «Қазақстан деген болған емес, Солтүстік Қазақстанда адам тұрған емес. Олар [қазақтар] болды әйтеуір, бірақ, оңтүстікке қарай өмір сүрді. Яғни, айналып келгенде, Қазақстан территориясы Ресей мен Совет одағының берген үлкен сыйлығы. Орталықазия елдерінде де осындай жағдайаттар бар»,- деген еді. Оның бұл сөзі ел азаматтарының ашу ызасын туғызды. Қазақстан СІМ-нің Ресей Федерациясының Уақытша сенімді өкілін шақырып, нота табыстауының бар себебі осы.
Оқи отырыңыз: Қазаққа жерді Ресей сыйға беріпті
MalimBlocks
