«Таяқ жеп өстік». Сәкен Майғазиев ақсақалдар академиясы мен отбасы институтын нығайтуды ұсынды

Танымал әнші Сәкен Майғазиев желіде бір немересін ұрып, екіншісін тербетіп отырған әжеге қатысты пікір білдіріп, қазақ қоғамындағы тәрбиеге қатысты көзқарас туралы сөз етті, деп хабарлайды Malim.kz.

Өнер иесі бала күнінде таяқ жеп өскенін және оның психологияға ешқандай кері әсер етпегенін айтады.

“Әжеңнің түйіп қалғаны мен атаңның нұқып қалғаны, анаңның айқайы мен әкеңнің ашулы көзқарасы майдай жағатын кездер-ай! Мына бейнебаяннан махаббатты, шынайылықты, тәрбиені, тазалықты, жанашырлықты көрдім. "Жасөспірім жарақаты" (Детская травма) дегенді қырық жасыма келгенде психологтан естідім" деген екен бір кісі. Психологиялық жарақат алмай-ақ, мұғалімдерден (апай, ағай), аға, әпкелерімізден таяқ жеп өстік қой. 

Өнер иесі ұлт болып қалыптасу үшін құндылықтарға көңіл бөлу керек дейді.

"Ақсақалдар академиясы, отбасы институты, жазылмаған дала заңы, асыл дінімізбен астасып, сабақтасқан салт-дәстүр, әдет-ғұрып, ырым-тыйым, үлкенге құрмет, кішіге ізет сынды құндылықтарды қайтару арқылы ұлт болып қаламыз деп ойлаймын.
Мына көріністің соңында бесіктегі балапанның әжесінің қолын сүйгені ерекше әсер етті. Қатты сүйсіндім. Міне нағыз махаббат! Әр әулетте атаның берген бұйрығы, әженің айтқан ақылы шеру құрсын! Жұма мүбәрак, жақсыларым!”, – деп жазды әнші. 

Фото: instagram.com/saken_maigaziyev