Қаңтарда көлігінде жанып кеткен желтоқсаншылардың ісі тоқтатылды      

Қаңтар оқиғасы кезінде Алматыда    әскерилердің атқан оғынан  көлігінде өртеніп қаза тапқан ерлі-зайыпты желтоқсаншылар  Қуат Біткембаев пен Гүлзифа Құлсұлтановаға қатысты тергеу ісі тоқтатылды. Оңтүстік өңірлік әскери-тергеу басқармасы оларды  атқан әскерилер  қызметтік өкілетін асыра пайдаланған жоқ деген мәлімдеме жасады.  

 Әскери-тергеу басқармасының қаулысында «48/386 әскери бөлімінің жауынгерлерінің 2022 жылдың 7 қаңтарындағы жаппай тәртіпсіздік, антитеррористік операция мен төтенше жағдай кезіндегі әрекеті заңды» деп жазылған. Блокпостта тұрған жауынгерлер тергеуде көлік ескертуге тоқтамады, оқ атуға тура келді деп жауап берген. 

 Марқұмдардың ұлы Дәурен Біткенбаевтың  істің тергелуін әділетсіз деп бағалайды. Тергеу ісі 1 жыл екі айға созылып келген.  Ол сараптамаға берілген мәйіт сүйектері де толық қайтарылмағанын айтады.   

«Ата-анам Сәтбаев пен Назарбаев көшесінен өтіп бара жатқан.  Сол кезде ту сыртынан әскерилер оқ жаудырған. Шамамен 50 шақты оқтың бірнешеуі бензин багына тиген болуы керек. Содан көлік өртеніп, әкем мен анам жанып кеткен. Өртенген көліктің сол жерде үш күн бойы тұрып қалғанын бірақ білдік» дейді ол.