Шымкентте полиция басшылары 7 жылға сотталды
Шымкент қаласының қылмыстық істер жөніндегі ауданаралық соты 4-рота командирі Қ. Әлімханов пен 8-рота командирі Н. Мырзалиевке қатысты үкім шығарды.
Шымкент қаласы полиция қызметінің басшылары жүйелі түрде жемқорлық жасағаны үшін сотталды,- деп хабарлады Сыбайлас жемқорлыққа қарсы іс-қимыл агенттігі. «Әлімханов пен Мырзалиев 7 жылға бас бостандығынан айырылып, мемлекеттік қызметте жұмыс істеу құқығынан өмір бойына айырылды. Олар қол астындағы қызметкерлерден «қамқорлығы үшін» тұрақты 5-10 мың теңге аралығында бірнеше рет пара алды деп айыпталды» делінген хабарламада.
Бұдан басқа, Әлімханов Шымкент қаласының тұрғынынан әкімшілік жауапкершілікке тартпағаны үшін өзінің қарамағындағылар арқылы 130 мың теңге сомасында заңсыз сыйақы алған.
Үкім заңды күшіне енген жоқ.
