Украинадағы соғыс Ресей аумағына өтті ме?
Украина президенті Владимир Зеленский соғыс Ресей Федерациясының аумағына өткенін хабарлады.
- Ресей агрессиясы ұрыс даласында сәтсіздікке ұшырады. Бүгін Ресей басшылығы бір-екі аптаға созылады деп күткен «арнайы әскери операциясының» жалғасып жатқанына 522 күн болды. Украина күшейіп келеді. Біртіндеп соғыс Ресей аумағына, оның символдық орталықтары мен әскери базаларында жалғасады, бұл табиғи және абсолютті әділ процесс», - деді Зеленский бес минуттық видео үндеуінде.
Кеше дрондар Мәскеу Сити ауданындағы екі кеңсе мұнарасының қасбетіне зақым келтірген. Бұл осы жылғы Ресей астанасына жасалған бесінші шабуыл. Бұған дейін 3 мамырға қараған түні Мәскеу Кремліне екі дрон, 30 мамыр күні таңертең Мәскеуге бірнеше дронмен шабуыл жасалды, 4 шілде және 23 шілде де түнде шабуыл жасалған болатын.
