Жұмыссыз ауыл тұрғындары жолды жауып тастады
Тұрғындардың басым бөлігі мұнай саласына жұмысқа орналастыруды талап етті
Маңғыстау облысының Жетібай мен Мұнайшы ауылдарының жұмыссыз тұрғындары әкімдікке наразы. Олар басшылықтан жұмысқа орналастыруды талап етіп, «Маңғыстаумұнайгаз» кен орнына баратын жолды жауып тастаған.
Қарақия ауданы әкімдігінің өкілдері жиналған азаматтарға түсіндірме жұмыстарын жүргізді.
«Жұмысқа орналастыру жалпы кезек бойынша жүргізілетіні хабарланды. Кезектен тыс жұмысқа орналастыру басқа үміткерлерге жасалған әділетсіздік болады", - деп мәлімдеді әкімдік қызметкерлері.
Әкімдіктің хабарлауынша, ауданда жыл басынан бері 366 жұмыс орны ашылған. Бұл мақсатқа биыл өңірлік жоба аясында 180 миллион теңге бөлінген.
«Қазір бұл бағдарлама бойынша 172 адам жұмыс істейді. Жұмысшылардың орташа жалақысы 170 000 теңге шамасында. Айта кетейік, қазіргі уақытта облыстық жұмыспен қамту орталығында орташа жалақысы 100 000 теңгеден асатын бос орындар бар. Бірақ тұрғындардың басым бөлігі жалпы кезекті айналып өтіп, мұнай саласына жұмысқа орналастыруды талап етіп, қарапайым жұмысқа барудан бас тартады», - деп қорытындылады әкімшілік.
