Коронавирусқа шалдыққан Алматы облысының әкімі Амандық БАТАЛОВ Нұр-Сұлтан қаласында емделіп жатыр. Бұл туралы әкімнің орынбасары Батыржан БАЙЖҰМАНОВ хабарлады.
Алматы облысының басшысы коронавирус жұқтырды деген ақпарат 2020 жылдың 22 маусым күні шыққан еді. Амандық ҒАББАСҰЛЫНА ем алып жатқанына жарты ай болды. Маусым айының соңында әлеуметтік желіде 67 жастағы шенеунік Талдықорған қаласындағы көпсалалы ауруханада бір блокта жалғыз өзі жатыр деген ақпарат шыққан еді. Артынша облыс әкімдігі баспасөз қызметінің жетекшісі Ғалмұрат ЖҮКЕЛ оны жоққа шығарған.
«Амандық Ғаббасұлы Талдықорғанда емделіп жатқан еді. Алайда, жүрегі мазалағандықтан Нұр-Сұлтан қаласындағы кардиологиялық орталыққа ауыстырылды. Ол кісі үнемі спортпен шұғылданады. Бұйырса сауығып кетер», - деді облыс әкімінің орынбасары Батыржан Байжұманов «Жетісу» телеарнасының тікелей эфирінде.
Сондай-ақ, Батыржан ҚҰЛАЙМАРГЕНҰЛЫ облыстағы ахуалды баяндады. Шенеуніктің айтуынша, Талдықорған қаласында 30-40-тай медициналық қызметкер жетіспейді екен. Жалпы, облыс бойынша 156 маман тапшы. Covid-19 күресу үшін бюджеттен бөлек демеушілерден 160 млн қаражат түскен екен.
Ресми мәлімет бойынша елімізде бұл індетке 51059 адам шалдыққан. Ал Алматы облысында 2750 адам ауырып жатыр. 610 адам сауығып кетсе, төрт отбасы қара жамылған.
Фото: baq.kz
Байланысты жаналықтар
MalimBlocks
