Мысыр астанасы Каирде жылдың үшінші Премьер-лига бәсекесі аяқталды, деп хабарлайды Malim.kz.
Айта кетейік, бұл санаттағы бәсекеге әр салмақтағы әлем рейтингінің таңдаулы 32 каратэшісі ғана шақырту алады.
Бұл жолы қоржынға 1 алтын, 1 күміс медаль түсті. Мөлдір Жаңбырбай 50 кг дейінгі салмақта қарсылас шақ келтірген жоқ. Бұл - оның Париждегі қоласы мен Ханчжоу Премьер-лигасындағы күмісінен кейінгі 3-медалі.
Ал Әсел Қанай (-61 кг) ақтық сында Украина спортшысынан жеңіліп қалды. Түркістандық спортшы қыста Парижде күміс, ал Ханчжоуда қолаға ие болған.
Сондай-ақ Айжан Бәкірова (-61 кг), Софья Берульцева (+68 кг) мен Диас Анарбеков (+84 кг) қола медаль үшін айқасты. Алайда спортшыларымыз соңғы сәтте жүлдеге бір табан жетпей тоқтады.
Осы алтынның арқасында Мөлдір жылдың үздік каратэшісіне берілетін Grand Winner сыйлығына қол созым жерде тұр. Енді жылдың шешуші Премьер-лига бәсекесі мамырдың аяғында Марокконың Рабат қаласында өтеді. Жаңбырбай сол сында кем дегенде топтық кезеңнен шықса, екінші жыл қатарынан аталған сыйлыққа қол жеткізді.
Айта кетейік, Мысырдағы жарыста барлығы 68 елден 383 спортшы күш сынасты. Оның ішінде Ұлттық құрама каратэшілерінің саны - 13.
Фото: Спорт комитеті
