Солтүстік Қазақстан облысының Есіл, Шал ақын және Мамлют аудандарында бұршақ жауғаны туралы тұрғындар әлеуметтік желіде жазды, деп хабарлайды Malim.kz.
Есіл ауданындағы Ясновка ауылында ірі бұршақ жауып, оның көлемі тауық жұмыртқасындай болған. Ал Явленка ауылында бұршақтың көлемі кішірек болғанымен, тұрғындардың мүлкіне және шаруашылығына зиян келтірген.
Ауыл тұрғындарының айтуынша, жауын-шашын шамамен жарты сағатқа созылған. Алғашқы 15 минутта қатты жаңбыр жауып, кейін бұршақ басталған. Дауылды жел соғып, гараж бен шаруашылық құрылыстарының бірінің шатыры зақымданған. Кей жерлерде қоршаулар да ұшып кеткен.
Бұршақтан жеке шаруашылықтардағы бақша дақылдары да зардап шеккен. Тұрғындардың сөзінше, қияр мен қызанақтың басым бөлігі бүлініп, өнімнің түгелге жуығы жойылған.
