Талдықорғанда жеке тұрғын үйде болған жарылыс пен өрт салдарынан үш адамның қаза табуына қатысты резонансты іс бойынша тергеу аяқталды, деп хабарлайды Malim.kz Tengrinews.kz-ке сілтеп.
Әңгіме 2024 жылғы 31 желтоқсанда Талдықорғанда болған қайғылы оқиға туралы. Сол күні екі қабатты үйде жарылыс болып, арты өртке ұласқан. Жаңа жылдық дастархан басында Бекпаевтардың үлкен отбасы отырған еді.
Өрт салдарынан жеті адам, оның ішінде балалар да зардап шекті. Олардың барлығы ауыр күйік пен жарақаттармен ауруханаға жеткізілді.
Дәрігерлердің барлық күш-жігеріне қарамастан, зардап шеккендердің үшеуін – Бекпаевтардың ерлі-зайыптысы мен олардың кәмелетке толмаған ұлын – құтқарып қалу мүмкін болмады.
Адамдардың қаза болғаны туралы ақпарат БАҚ пен әлеуметтік желілерде тез таралып, қоғамда үлкен резонанс тудырды. Қолданушылар жарылыс пен өрттің себептеріне қатысты сұрақтар қойып, істі Бас прокуратура мен Ішкі істер министрлігінің бақылауымен мұқият тергеуді талап етті.
Кейінірек жарылыс табиғи газдың ағуынан болғаны анықталды. Екі қабатты үйдің маңында жер астымен төмен және орта қысымды газ құбырлары өткен, олардың қауіпсіздігіне екі өңірлік газ компаниясы жауапты болған. Солардың бірінің иесі тиісті қызметті талапқа сай көрсетпеді деген күдікпен қылмыстық істің фигурантына айналды.
Іс бойынша сарапшылар мен мамандарды тарта отырып, бірқатар тексеру сараптамалары жүргізілді.
“Тергеу Қылмыстық кодекстің 306-бабы – “Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтер көрсету” бойынша жүргізілді. Іс ерекше бақылауда болды. Газ компаниясының 51 жастағы басшысы ұсталып, сот оған қатысты қамауда ұстау түріндегі бұлтартпау шарасын санкциялады. Қазіргі уақытта айыптау актісімен қылмыстық іс сотта қаралуда”, – деп хабарлады Жетісу облысы ПД баспасөз қызметі.
Ата-анасы мен бауырынан айырылғаннан кейін Бекпаевтар отбасының жауапкершілігін үлкен ұл Ернұр өз мойнына алды. Қамқоршылықты алған жас жігіт жарылыстан зақымданған үйді қалпына келтіруді қоса алғанда, түрлі құқықтық және тұрмыстық мәселелерге байланысты көптеген қиындықтарға тап болды.
