Ұлыбритания азаматы NU-дың жаңа президенті болып тағайындалды
Оның алдында бұл қызметте Жапония азаматы болған еді
2024 жылғы 28 маусымдағы Назарбаев университеті (NU) қамқоршылық кеңесінің шешімімен президент қызметіне Ұлыбританияның азаматы А. Вакар таңдалды, деп хабарлайды Malim.kz.
Университет мәлімдемесіне қарағанда, А. Вакар Брэдфорд университетінде (Ұлыбритания) PhD докторы дәрежесін алған. Доктор Вакар карьерасында Йорк университеті мен Лондон университеттік колледжі (Ұлыбритания) профессоры қызметінен Мидлсекс университетінің (Ұлыбритания) проректорына дейін көтерілген.
2001-2004 жылдары доктор Вакар Ұлыбритания премьер-министрі канцеляриясы ғылым департаментін басқарған.
2017 жылдан бастап Абу-Даби университетінің ректоры болды. Ол басшылық еткен жылдары Абу-Даби университеті Times Higher Education беделді рейтингіндегі үздік университеттер арасында 250-300 диапазонына дейін көтерілген.
Беделді ғылыми басылымдарда 90-нан астам ғылыми жұмысы жарияланған.
Айта кетейік, оның алдында университет президенті қызметін атқарған Шигео Катсу 2023 жылдың мамырында орнын босатқан еді.
Фото: NU
