Алматыда «Дикий Арман» лақап атымен танымал Арман Жұмагелдиевке қатысты сот үкімі шықты. Ол 20 жылға қамалды, деп хабарлайды Malim.kz.
1 жыл 3 айға созылған сот процесінің ақыры осылай бітті.
Ал онымен бірге айыпталушылар қатарында болған Алматы қаласының бұрынғы мәслихат депутаты Қайрат Құдайберген 8 жыл арқалады.
Сонымен сот үкімі бойынша:
Арман Жұмагелдиевке – 20 жыл бас бостандығынан айыру жазасы тағайындалып, түрлі ұйымдарға қатысуға, шаралар ұйымдастыруға және БАҚ пен әлеуметтік желілерде жарияланымдар жасауға тыйым салынды;
Бұрынғы ҰҚК 5-басқармасының басшысы Руслан Ысқақов – 15 жыл 6 айға бас бостандығынан айрылды;
Бұрынғы қаржы полициясының агенті Талғат Махатов – 15 жылға бас бостандығынан айрылды;
Бұрынғы депутат және кәсіпкер Қайрат Құдайберген – 8 жылға бас бостандығынан айрылды, сондай-ақ, әлеуметтік желілерде қатысуға, митингілер, дебаттар өткізуге, шаралар ұйымдастыруға және БАҚ-та жарияланымдар жасауға тыйым салынды.
Журналист Бердах Бердімұратов – 7 жылға бас бостандығынан айрылды.
Айта кетейік, Арман Жұмагелдиев Алматыда «Қаңтар» оқиғаларынан кейін 2022 жылдың 7 қаңтарында ұсталған еді. Сот процесі 2023 жылдың қазанында басталып, процесс жабық режимде өтті.
«Дикий Арманға» жаппай тәртіпсіздіктерді ұйымдастыру мен қатысу, атыс қаруын ұрлау, оны заңсыз сатып алу немесе сақтау, сондай-ақ, адамдарды бостандығынан айыру сияқты айыптар тағылды.
Сотта ісі қаралған жалпы 40 адамның қалғаны 1 жылдан 15 жыл 6 айға дейін әр түрлі мерзімге бас бостандығынан айыру жазасына кесілді.
Фото: видеодан скриншот
